قصائد قصيرة جداً

(قنوط)
امد خلف النافذة يدي
اقبضها أردها
ألمس بها شي
وآخذه
القى بها حفنة ظلام
أروح للصنبور
أغسلها وانام
(موت)
امدد اقدامي
جدار قدامي وجدار من خلفي
اموت رغم أنفي
(غبن)
عمر الجروح بيوم
ماكانت الورد
وعمر الذي في النار
ماحس بالبرد
الورد ينزف شذا
والجرح ينزف دم
ومابين هذا وذا
شوف المسافه كم؟
صار اصبعي ريشه
صار القلم فرد
ومشرد حروفي
ترعى مضارب جرد
بعض القصايد غذا
وبعض القصايد سم
والبعض الاخر كذا
(صرخه بليا فم)
(رصيف)
على رصيف الشارع المظلم جلس
يقلب اوراق السنين
الشارع الأول نظيف
الشارع الثاني مخيف
الشارع الثالث أبد ماله (رصيف)
(متشابهات)
متشابهات
وجه ٍ يشابه وجه
حرفٍ يشابه حرف
صوتٍ يشابه صوت لكنها
ماتشتبه في اختيار الموت
(حاله)
كنت ذاهل بحزني مسجي
وحيد اتهجى
دم الصمت الابيض يسيل
في عروق الكلام
(وقت)
يدخل البرد ليّن من النافذه
يدخل الوقت دافي
لمست الوقت دافي
لذيذ / وطري
حار مثل الرغيف
(لوحه)
ارسم بحر
ارسم قوارب صيد
ارسم ناس صيادين
ارسم ساريه
وخيوط سنارة سمك. بس
واترك الموجه بريشة صمتها
تمحاك فيه وترسمك
(سكن)
لو مافتحتي شرفة الغيمه البعيده
مانتفض قلبي كما العصفور من صدري
وراح يطير يطير يطير
كم غيمة قالت: تعال
وكم شجرة قالت: تعال
وكم نجمة قالت: تعال
من دونها ليلٍ مطير
وسنين من ظلما وريح
مالك مطير
وكل قطرة دم في قلبي تصيح
وتقول: طر فوق وتعال
طر فوق وتعال طر فوق وتعال تعال
ورحت اطير اطير
حتى وصلت لجنة ايدينك جريح
ولو مالجراح ماحمحم الريحيان بين اصابعي
ولانبت في دفتري عشب الصباح
(الجمهور)
ياسيدي الجمهور
لولا عذوبة مانقول
كان الحقول
صارت أراضي بور!
(عزيزي الجمهور)
ان مافهمت اللي نقول.!
تقدر تطفي النور