بالبلدي الفصيح

د. هاشم بن عبدالسلام بن محمد جمعة
أيوة زي ما سمعت، أنا ما بسألك.. انا باتحداك رغم تأكدي من إجابتك!! مين فينا ما يبغاها تصير.. من جد جدة غير !
جلست بيني وبين نفسي أفضفض، من كثر ما ضاق صدري كل ما خرجت مشوار ورجعت البيت إيش بها جدة يا ناس؟ والله ما صارت زي أول، لا شوارعها ولا ناسها مو معقول نقبل بحال جدة زي كذا سنة ورا سنة تتدهور، ليش كل شي نسويه لازم نشوف معاه أمور ما ترضينا، ولا المفروض نقبلها أصلا، تعال ناخذها واحدة واحدة كذا نحلل المشكلة فين، وبعدها يفرجها رب العباد ويهدينا لحلول.. كلنا مع بعض.. مو بس الأمارة أو المحافظة أو أمانة جدة.. لمتى نقعد نشتكي من هدول كلهم ونقول مقصرين في حقنا؟ ما هو كل جهة من ذي الجهات ماسكينها بشر من أهل جدة، وعندهم نفس مشاكلنا.. يعني أغلبهم عارفين كل ألي إحنا نعانيه.. وبرضوا زيهم زينا، طرف رئيسي في كثير من الي مو عاجبنا في حال جدتنا.
أنا راح أفكر بصوت عالي، وإنت أحكم بنفسك، قولي لو إني بالغت، أو حسيت إني عايش في كوكب ثاني.. ولو لقيت في كلامي شي ما هو صحيح، ياسيدي من الآن أنا راح أعتذر لك ولجدة ولكل من جرحت مشاعره بكلامي متفقين.. على بركة الله.