( الدبلة )

الشاعر الجميل عبدالله عوجان خص (ملامح صبح) بقصيدته الجديدة(الدبلة)التي تجسد مايتميز به من إبداع وعذوبة.
اقرأوا عبدالله لتشاركونا المتعة حيث يقول:
يا دمع نجلات السحاب اليا امطر
وأضفى على وْرودك نداه وْوبله
ندى الورود اللي لعيني يقطر
اعذب طواريق الغزل تكتب له
بأقلّدك شعري قبل تتمخطر
في خافقي والوصل يفتل حبله
هذا قصيدي فيك قبلك تخطر
قلبي وقبل القلب يعرف سبله
وشلون لا منّ الفؤاد بْك افطر
وْوشلون لا منّك لبست الدبله
والله لأصوغ الشعر حتى يصطر
واهديك احاسيسه بورد وْقُبله
قلبي واعرْفه زين صبّ وْمضطر
للحبّ لين تجنّنه وتهبله
أجنّ من مجنون ليلى وأخطر
وْمن حبّ عنتر للحبيبه عبله
انت اللي أعرَف في خفوقي وأشطر
وْحبّ الشرف لا بعده وْلا قبله
يا عمري اصبر واصطبر ثمّ انطر
للّيله اللي فيها اجيب الدبله