خواطر من فوق السحاب

من يومين استضفت في برنامجي في الفضائية المصرية سفير المملكة المغربية بالقاهرة لاجل طبعا نعمل معاه واجب الاعتذار عشان اللى حصل من مذيعة بالقنوات الخاصة و اسائتها للمغرب... خلال الحلقة جالنا كذا تليفون عشان يكلموا السفير ,,, بدر عبد العاطى المتحدث بأسم الخارجية ..سفير مصر بالمغرب ....عصام الامير رئيس اتحاد الاذاعة و التلفزيون و حتى الناس العادية اتكلموا ...كله بيعتذر عن اللى حصل و اللى اتقال .. بصراحة الراجل كان ف منتهى الادب و الاحترام و بين كل كلمة و كلمة يأكد ان مفيش اى حاجة ممكن تأثر على علاقة البلدين خرجت م الحلقة بقول لنفسى يعنى مجرد غلطة غير مسؤله و غير مهنية من مذيعة ف قناة خاصة خلت مصر كلها بمسؤليها بمواطنيها تعتذر ...و بلاد تانية زى تركيا ولا قطر قايمين نايمين يشتموا فينا من خلال قنواتهم و بيانتهم الرسمية بل على لسان مسؤليين كبار فيهم و مشفناش حتى عيل صغير هناك بيحاول يعتذر و رغم كده خطواتنا التصعيدية تجاه الدول دى ماشية بشكل دبلوماسى و تدريجى حقيقى الاعتذار من شيم( الكبار ) بسسس فعلا فيه دول مهما اتغنت فقيرة .. و دول تانية مهما قاست و عانت و افتقرت و اتنهبت و اتهانت بتفضل عزيزة و كبييييرة و عظيمة انا مايهمنيش مصر تبقى قد الدنيا ولا ام الدنيا .. انا كفاية عليا ان الدنيا فيها ( مصر
************
العيل الاهبل بتاع الليسيه اللى اسمه (اسلام يكن) اللى راح جند نفسه ف داعش و سمى نفسه ( ابو سلمى يكن ) بدل اسلااااام على اساس اسم اسلام حرام عندهم غالبا بس (يكن) حلال ؟؟ المهم بعد ما قتله كام قتيل و قطعله كام رقبة و اتصورله مع كام جثة اظاهر حب الموضوع اوى و اخدها هوايه قام عامل اعلان على تويتر للى عايز يجند نفسه عند الدعاديش يبعتله رساله و هياخد 5000 دولار و عروسة و شقة :))) يابن الاييييه يا اس اس ده انت ولا زيرو 900 شايفين يا بهوات عروض الصيف ....مش تقولى ندور على اسامينا ف ازايز كوكاكولا يالا يا شباب... ابو سلمى السكرة عامل اوفر لكل اللى شايف ف نفسه سفاح محترف و مش واخد فرصته ...شقة و عروسة و 5000 دولار و ساندوتش بسطرمة و حتتين جاتوه ...و طبعا زى ما كلنا عارفين ان ده كله ... فى سبيل الله طب و عزة جلالة الله ربنا ما هيسيبك يا اسلام و ف الدرك الاسفل من النار ان شاااااااء الله و ابقى سلملى على سلمى
*********
بعيدا عن الرواية لان فيها اختلافات و ده طبيعى لان مش كل اللى يتقرا ينفع يتشاف لان ممكن تفقد معناها و النهاية برضه مختلفة لكن كفيلم مصرى بالجودة دى و الجرافيك و الاخراج و التصوير ده اكتر من ممتاااااز ..طبيعى يبقى فيه نقد و طبيعى ناس ماتحبهوش لكن الفكرة اننا نشجع الفن الكويس و الناس اللى بتحاول .. و عجبنى بقى اكتر انه نزل ف العيد ..و الاكتر و الاكتر انه دايما كوبليييييييييه
إعلامية بالتلفزيون المصري