خلوها

جمعت إحدى المحاورات الشعرية ذات مساء كل من الشاعر والاعلامي عبدالله الفارسي والشاعر حمود البغيلي واليكم مادار بينهما في تلك الليلة الجميلة..
البغيلي:
انته علامك تغط النور وانته فطين
هذي عوايد دخيله في حروب الحجاز
ان كان يالحربي اغواكم بليس اللعين
لاتضرب الناس في كفك وبيتك قزاز
الفارسي :
ان كان عندك على ماقلت لي شاهدين
الد لك بالنظر واقول بيتك عزاز
وان كان هذي سواليف الحسن والحسين
الناس تدري عن اللي يوم الافعال فاز
البغيلي :
انشد وتلقى الخبر في دفتر الاولين
وان كان قلبك ضعيّف روح ركب جهاز
تحمد الله على الاسلام والمسلمين
خلوك تمشي بهالدنيا بليا جواز
الفارسي:
مايرصدون الحقيقة ناس متحيزين
لاتعتنز في رجال ٍ ماعليها اعتناز
وانته ( حمود البغيلي ) والعرب عارفين
الكلمه الصادقه ماهي سوات النشاز
البغيلي:
العلم ثابت ولاتمحاه طول السنين
وانته من اللي جرى في داخلك خاز باز
واليوم صارت سهود مهود والله يعين
عقب الجمل صرت تركب من جديد الطراز
الفارسي :
انته تبيها لكن اهل الفعل رافضين
لو هازت الناس صفك صفنا مايهاز
حنا على وضعنا اللي تخبره ثابتين
ماهمنا قوة الطاغي ولا الابتزاز
البغيلي :
اصفوفنا عامرات من يسار ويمين
وانطق في راسكم بالحق بير ارتواز
الذيب مايلتفت في راغة ابا الحصين
والنار تكبر ليا جبنا لها خام قاز
الفارسي:
صفوفكم في نهار الفعل راحت طحين
والطيب اللي تحرز حزة الاحتراز
الفعل ماهو لمن غنى وجر الونين
الفعل للي يروز وماقفه مايراز
البغيلي :
القول والفعل قاسي عندنا مالين
ولا خذت في الجولة الاولى علينا امتياز
يوم انكسرت وخضعت وطحت للطامعين
لو ترتكز ماكتب لك في الحياة ارتكاز
الفارسي:
ياحمود في الهرج من قدك وترطن رطين
وان عودت للفعول نحط بكره مراز
يوم التحدي وصلت مع اول الواصلين
وانا على موقفي ماصار فيه اهتزاز