قصيدة “بعض السوالف” للشاعر “مصلح بن عياد الحارثي”

يا الله يا رافع سماك أرتفاعي
مدك ولا مد اليدين البخيله
•••••••
أنا ليا ضاقت علي المساعي
أشكي على راع العطايا الجزيله
•••••••
وأنا ليا جاني من الربع داعي
يا عنك ما روحي عليهم ثقيله
•••••••
أقلط بجنب الضيف وأقصر ذراعي
وأشره على راع الذراع الطويله
•••••••
اللي يلوف ابها الصحن ما يراعي
شق الصحن ما يقنعه عن قبيله
•••••••
عسى تلوفه مطلقات الافاعي
لا صار لا ينقر ولا فيه حيله
•••••••
وأنا ليا جاء الضيف مديت باعي
رزقي ورزق الضيف ربي وكيله
•••••••
يقلط على هبات ريح ومتاعي
ومهيلاتٍ مابهن جنزبيله
•••••••
وأدوّر أغلى ما يسام ويباعي
وأشريه لو أن الدارهم قليله
•••••••
أنا أدري أن المدح كثره ضياعي
لكن حاديني على المدح ميله
•••••••
تحسني هرجة رفيقٍ صناعي
وده يشب النار بين القبيله
•••••••
يقول أنا الشبعان وأنتم جياعي
والهزل ما تصعب عليه الهزيله
•••••••
بعض السوالف لبّسوها شراعي
مقّعادها في بيت أهلها جميله
•••••••
الناس في نعمه وأمان وقناعي
حتى الفقير اللي قليلٍ حصيله
•••••••
باساير أصحابي واعيش أجتماعي
وأن ضاق منّا مجلسٍ ما نجيله
•••••••
نضرب تهاتيه الدروب الوساعي
والبعد عن من لا يبينا فضيله
•••••••
من لا يجي سبعٍ كلته السباعي
ومن لا يشيل الحمل لا يرتكي له
•••••••
الله من قلبٍ يزوع أنزياعي
زوع الركاب أليا عطن المسيله
•••••••
عصريةٍ يوم الرعايا رياعي
قدامهن من زين الآزوال زيله
•••••••
في حايزٍ عشبه جديد المراعي
يومٍ بعد يومٍ يعله مخيله
•••••••
يا مل طرفٍ يصبح الصبح واعي
مابه ولا نجمٍ بدى ما يخيله
•••••••
قامن هواجيسي هجوم ودفاعي
تصافقن القلب وأعمن دليله
•••••••
الآولات أخذن طواف الوداعي
والتاليات أخذنّ قلبي وسيله
•••••••
أليا أرتكز في ثومة القلب شاعي
أبطى علي الصبح ليلي وليله
•••••••
قلّوا زحازيح الرجال الشجاعي
كثروا مصدين القلوب العليه
•••••••
هدامة المجلس خباث المساعي
كلٍ على جدلاه يومي شليله
•••••••
وأن قالوا الليله وعد وأجتماعي
تجمّعوا والخاتمه مستحيله
•••••••
هذا لكز هذا وهذاك فاعي
أصواتهم صلبه والأرياء هتيله
•••••••
أن كان ما للدار والمال راعي
زل السّبل ما باقى آلا قصيله
•••••••
يا دار وين مشيدين الرباعي
وجدي عليهم وجد مجنون ليله
•••••••
أقفت بهم شهب الليال الجياعي
اعضامهم تحت النثايل هليله
•••••••
وجدي عليهم وجد طفلٍ رعاعي
الموت ذب أمه وأبوه وخليله
•••••••
أليا عطوه الخلف عاف الرضاعي
كنه يولع عند خشمه فتيله
•••••••
وأليا عطوه الزاد جر النواعي
لا أُمٍ تروقب له ولا أبّوٍ يشيله
•••••••
صوته تقطع في حشاه أنقطاعي
وآعزي لحاله ويا عزتي له
•••••••
أشكي على قومٍ تحل النزاعي
حكامةٍ بين العميل وعميله
•••••••
آل السعود مسيرين السواعي
من فوق غبات البحور المهيله
•••••••
نقالة البيرق حصون الدفاعي
سهوم المنايا أهل السيوف الصقيله
•••••••
أنظارهم منها يولّع شعاعي
وسيوفهم منها العوادي ذليله
•••••••
أعيال حرٍ ما أبتدعها أبتداعي
قيدوم ركبٍ عقبن الثميله
•••••••
صقر الحجاز ونجد حرٍ شجاعي
مروي سنان السيف منجي دخيله
•••••••
أشكي عليهم لوعتي وألتياعي
وعينٍ يغازلها السهر وتغزي له
•••••••
الشاعر : مصلح بن عياد