قصيدة للشاعر حسن بن حلوه

يالله اجعل لي مع الوافي قبول=خوة الوافين للوافي (دوا )
لانها لازادت الدنيا حمول =مايوقّف غير بيضان (النوا)
مرهقين (الطّيب) لين انه يقول :=لاحقّني من عزايمكم (ثوا)
عارفين ان كل شيٍ له اصول=وحاسبين حساب ذيبٍ لا (عوا)
تقرن الاقوال في صدق الفعول=والعزوم اقسومها ماهي (سوا)
الهدان اليا نخيته مايطول =من تعزوا بالفلس ياكل (هوا)
لازهمته كنه شارب له كحول=والروّابع ماتعرف الا (الغوا)
وان سمع طاري الشّلي صابه ذهول=يحترق في نار ذكره با(ستوا)
من تجمّل به فلا يمكن ينول =غير درس ايعلّمه طبع (الروا)
بينه وبين الردا حب وميول =شابعٍ الذل منّه و (ارتوا)
يجمع اجناسه وتقرع له طبول=يبغي المرقاب لكنّه (هوا)
علةٍ في الوقت ماحوله حلول=عايشٍ في عز ما قط (انكوا)
ودّه ان وقعه مثل وقع الزحول=ويسّس اطياف ومجاميع و(قوا)
لكنٍ الذل في راس الذلول =يشحنه (ناقص) مثل كرت (السوا)
جعل من لا فاد في ربعه يزول=دام مايفزع ولاقام و (أوا)
وجعل مايبقى عقب موته فلول=ويندفن ذكره وكل اللي (حوا)
وجعله افدا اللي على العليا يصول=بانيٍ عمدان عزّه ما (انطوا)
كل طيبٍ يمتثل لامره مثول=مهتويه العز يوم انه (هوا)
عارفٍ دربه ولا يعرف نزول=ومن عذل به قلت له مالك (لوا)
هذي القصه لها اجزاء وفصول =وكل رواي مقتنع فيما (روا)
ويالله اجعل لي مع الوافي قبول=خوة الوافين للوافي (دوا)
حسن بن حلوه