عاصفة العاصمة

قبل البارح جانا بالرياض مطر ما عمرنا شفنا مثله يمكن من عشر سنين، خلال دقايق معدودة والشوارع فل من الموية والناس مختبصة، وانت واقف بسيارتك من اربع ساعات تنتظر السيارات اللي قدامك تحرك، تستغرب وش يخلي نفق ضخم يمتلي موية لين يصير كنه بحيرة، يعني هاللي سووا النفق كانوا كاتبين في العقد انه نفق صحراوي، يعني ما يدرون انه بيجي مطر، وبيني وبينكم اللي يعيش بالرياض ما يصدق على الله يجي مطر تلاقيه رجال وش كبره وعرضه لا قالوا له بزارينه: بابا مطر.. طمر وراح يركض للحوش، ثم وقف عشر دقايق برا والمطر يطبل على خشته، وبزارينه يطالعونه ويتحمدون الله ويشكرونه على نعمة العقل وينشدون بعض: ابونا وش يحس فيه، ما فيه نفق بالرياض الا من رحم ربي ما وصلت المويه فيه الى نصه، منظر ما ودك تشوفه، ودك تجيب شركة المقاولات اللي بنت هالانفاق وتمحط فيهم بنص بحيرة النفق، ليش ما نعرف البلاوي والغش ونبدأ نشتغل صح الا بعد ما تجينا نكبة، نكبة جدة صار لها حوالي الست شهور، المفروض خلال هالست شهور سوينا حل عاجل، عاد حنا اطلق ناس في الحلول العاجلة اللي من نوع مشي حالك، نبي حل عاجل وفوري لأمطار الرياض وانتوا اشتغلوا براحتكم وعلى اقل من مهلكم مشاريعكم اللي تقولون ان ما فيه ازين منها، وحنا نسمع فيها ولا نشوفها!