مباراة (دربي) راسك

يوم الثلثا الجاي كاننا من الحيين موعد مباراة النصر والهلال، أو الهلال والنصر (يا عيني يا محايد)، ومن الحين بدت اعراضها تظهر على خدود مشجعين الفريقين، تشوفها مشدودة وبالذات لاقروا بعض الجرايد اللي بعد هي شدت حيلها تحرش وتشحن الجماهير، وبدت إدارة الفريقين تصير حليلة مع اللاعبين، اللاعب اللي ناقص له كم راتب راح يستلمه، واللي مطنقر يبي زيادة كم قرش بالعقد حقه راح يستلمه، وهالمباراة مع انها تعتبر الشوط الاول الا انها راح تكون هي مباراة الكاس الحقيقية، ولا راح يكون بعدها مباراة أزين منها، راح نشوف الملعب مليان بإذن الله مع الناس عطلة مدارس وكاشتين للبر الا ان مصادري اللي ما تخرش المية تقول ان الدرجة الثانية بالملعب ما راح تلاقي فيها كرسي فاضي، واكبر الخوف ان المباراة يكون فيها محارش وكم كوع وانبراشة على غير سنع، ليش؟ لانها مباراة دربي ما فيها يا امة ارحميني، اللاعب اللي راح ينجم فيها راح يضمن خانته كم سنة جاية، واللي ما يتوفق فيها لا يتعب نفسه وينتظر فرصة ثانية، أنصحه يدور له وظيفة ثانية ابرك له من المطارد ورا الكورة، النصراويين يقولون اخ ليتك يا ماجد عبدالله، والهلاليين يقولون اخ ليتك يارفلينيو للحين موجود، طبعا اللي اعصابه باردة ومرتاح هو اللي ما يشجع الفريقين، يشتري كيس فصفص ويحط رجل على رجل ويشجع اللعبة الحلوة، حلو انك تدربي راسك مع الروس بكل مباراة دربي، عشان تحافظ على اعصابك، وكنسل راسك في مباراة الكلاسيكو (حسبي على من علمك المصطلحات.. قم طس.. شعرفك للرياضة)..
- طيب خلني اقول للقراء برب.
- اقول انقلع لا محطك بقس من نوع (زعبيل)!