الموية تكذب الغطاس

ياكثر مانغشينا من ناس عملوا لنا البحر طحينه، وفيه علامات واضحة فينا، حنا يالناس المغفلين اللي مو راضي القانون يحمينا، حسبي الله على من اخترع نظام القانون لا يحمي المغفلين، يااخي القانون الناس حطوه عشان يحمي المغفلين والا الصاحين مو محتاجين قانون لان صحاوتهم حاميتهم من النصابين، الميه او الموية تكذب الغطاس خلها حكمة قدام عيونك، علقها بجنب دعاء السفر اللي معلقه بمراية السيارة الامامية، مهما جوك ناس وحسيت انهم اصدق ناس ويبغونك تدخل معهم في موضوع مضبوط مية بالمية لاتدربي راسك وراهم، لاتصدق ان برجك اليوم في الجريدة يقول لك: تجارة جديدة تدر عليك ربحا فلا تترد، انتبه يامسكين، الناس ماعاد فيهم رحمة، مايفكرون غير بالقروش، شي يخلي الدماغ يخلي كنه قدر ضغط ناسيه راعيه، خل قانون الموية قدام خشتك، بس لاتلخبط وتحسب ان الغطاس انت.. افهم يامال الغنيمه.. الغطاس الصتيمه اللي انت متوجسن منه انه يروغ عنك وتلاقي حالك بالخلا الخالي، لاتصير من الناس اللي لاركض ورى واحد مايعرف يفرمل، حط ببالك ان هالواحد اللي تركض وراه راغ بسرعه البرق ساعتها انت تطلع سيده ولاتقدر تلف الا وهو قد اخذ اقرب مخرج، بعض البشر ذهين مايخليك تحس انه راح يروغ، عاد هذا ماينفع فيه غير انك تكثر الدعاء والصدقات لان ربك سبحانه ماراح يخليك، بعض الناس مضيع الشغلتين، دلخ وبنفس الوقت ماهو متكل على الله، الله يخارجنا هالايام كثروا اللي يسوون حالهم يفهمون بالغطس!