البنوك معصي تتطور

يستغرب الشخص لما يشوف البنوك عندنا ما هي قادرة تنافس في مجال تقديم خدمات تكنولوجية تقنع الناس وتسكت امثالي اللي يدورون أي شي عشان يشبعون فيه لطم وتولول، تطورت كل البنوك في العالم في تقديم خدمات للعميل بشكل مريح وخالي من الاخطاء، الا الكثير من بنوكنا اللي ما زالت مكانك راوح وللحين مو قادرة تكسب ثقة العملاء، وخدماتها التكنولوجيه تعل الكبد وتجيب القولون والقرحة، فرحنا لما عرفنا ان الخدمات البنكية الهاتفية راح تشتغل وأول ما اشتغلت دعينا ربنا اننا نرجع على النظام الأول، فيه بعض البنوك ما يعتمد لك خدمات التسديد بواسطة الهاتف الا بعد ما تراجع الفرع وتوقف سرى وبعدين تقابل موظف طفشان ونفسه بخشمه، تجلس بجنبه على الطاولة وانت تتوقع كل شوي يعطيك بقس والا كف وتدعي بقلبك يا رب متى اخلص واهرب بجلدي من ها الموظف اللي كنه متخرج من نادي ملاكمة مو موظف بنك، يرمي لك الكي بورد ويقول لك من غير نفس: دخل رقم سري، انت تخاف تسأل حق ايش؟ وتدخل رقم سري، لأنهم ما يشرحون لك الا بعد كم اسبوع من المراجعات، بعد ما تحاول عشرين مرة تسدد بجوالك وبعد ما تمل تروح للفرع مرة ثانية عشان يشرحون لك مرة ثانية، هذا غير آلاف المرات اللي تسدد فيها بواسطة الفيزا وتنخصم عليك مرتين، وقابلني ان رجعت فلوسك قبل سنة!