لا تنس (الموت)

بعض الناس اللي الله ينعم عليه بكم قرش ويصير عنده محل تجاري والا مؤسسة ويجيب عمال المفروض إنه ما ينسى نفسه ويقوم يشطح وينطح وينغر من مجاملة وترفيع كم واحد من العمال اللي على كفالته لين ينتفخ وما عاد يطالع إلا على السقف، ترى العامل اللي يستقبلك بالتراحيب والمدح ويمد لك البخور لو الود وده إن يرض المدخنة بخشتك لين يشوي خشمك وتعرف إن الله حق، تعامل بعض اصحاب التجارة مع العمال اللي على كفالتهم ما يرضي الله ولا يرضي خلقه، الإنسان لا صار ما عاد يفرق بين الحلال والحرام يصير مثل البهيمة حياته ما لهم طعم، بذمتك يا قارئ لو شفت عامل شايب جالس على رصيف يبكي من قهر كفيله له وش ردة فعلك؟ صدقني إن هالموقف وغيره مواقف كثير حصلت من كم كفيل يحسبون إن رب الكون غافل عنهم، ترى الفلوس تروح وتجي ولا يبقى قدام ربك غير عملك الطيب اللي سويته هو اللي ينفعك، ترى العمال فيهم مسلمين وهذولا إخوانك في الدين واللي ما تظهر حميته وشهاميته لا صار الدعوى فيها دين هذا رجال ما عاد فيه خير ولا رجا، نظام الكفيل محتاج ضوابط ومحتاج تعديلات، ليش لأن فيه بعض السعوديين اللي تحت كفالتهم كم عامل يتعاملون مع عمالهم معاملات غير إنسانية وقاعدين يكدونهم فوق طاقتهم ولا يعوضونهم وهذا الشي هو اللي خلى الكثير من العمال لا من هرب من عندنا لا شافنا في بلده يقوم يتفلت وده يتوطى ببطنك!