سد نطحات الفال

ياخوي مدري وش سالفة بعضنا اللي ماخذين سالفة الدايت هذي وجاهة، ماخلا أحد ماعلمه انه مسوي رجيم عشان يبي ينزل 20 كيلو في اسبوع، وش عندك ياملاكم وزن الريشة.. والين هنا ماعندنا مشكلة، بالعكس من حقه.. المشكلة اول عزيمة يروح لها تلاقيه طايح ضرب في هالنعمة، وبعد مايخلص.. يقوللك كلمته الشهيرة «خربنا الريجيم ياولد» ويردون عليه اللي معاه بالكلمة الاشهر «يارجال عليك بالعافية.. مرة وحدة ماتضر»!
الوكاد ان الدايت هذا انواع.. وفي الغالب كل اللي يطبقونه عندنا يطبقونه غلط، ولا احد فيهم قد فكر يستشير ناس متخصصة، محسب الدعوة خذني جيتك، واحد يحرم نفسه من الاكل طول اليوم ويجي في الليل يتعشى بخيارة.. والثاني مسوي فاهم معتمد على السوائل بس.. وطبعا هذا كله مامعاه أي نشاط بدني.. اكيد طبعا، وشلون بيبذل نشاط وهو جسمه طافي وممنوع من كل شي.. وفي نوع دايت يسمونه «كلوديا شيفر» وهذا يعتمد على الاكل الني، ونوع يعتمد على حبوب تخسيس وماتخسيس، وقفل شهية وسد نطحات الفل.. وكله عشان هالعشرين كيلو اللي يبي يخسرها!
المضحك في الموضوع.. بعد شهر تقريبا.. يجي الاخ الكريم يوزن ويتفاجأ أنه وزنه زاد.. ليش؟ لأن الدايت حقك مدري وش يبي اصلا.. وخل كلوديا تنفعك يا براد بيت!