لاتزعل لاكتشفت ان رجلك اقصر من الثانية!

تبون الصدق ياجماعة.. أنا أعرف أنكم مثلي محتارين ودايخين مانتم عارفين وش الفرق بين حماية المستهلك وبين وزارة الصحة خصوصا إذا ظهر شي تجاري يدمر صحة الناس.. دايم نقرا عن أشياء حنا طايحين فيها ويطلع عنها خبر أنها تسوي أمراض وبلاوي زرقا.. ويا ربي لا تغيرها علينا من نعمة من كثر الفضاوة عندنا ما غير رايحين جايين نشتري في الأكل وأدوات تفتيح البشرة وحبوب الريجيم اللي تنوكل قبل الأكل واللي تنوكل بعد الأكل واللي تأكلها على لحم بطنك عشان تخرط البنكرياس ويجي محول على المثانة ويطلع خصر ولا خصر جنيفر بنت لوبيز بس بعد ما تخلص الريجيم لا تزعل إذا لقيت وحده من رجولك أقصر من الثانية لأن وزارة الصحة مدري حماية المستهلك تاركين لنا الحبل على الغارب وحنا ما غير نلهم أي شي في يدينا من زود حبنا للرشاقة.. النكبة يا جعلني ما ذوق حزنكم أن الإخوان في العالم المتقدم يقولون لنا انتبهوا من الشامبوهات اللي تطلع رغوة كبيرة لأن السرطان يكون لا بد في بطنها وحنا ما ندري.. اسمعوا الكلام اللي يجمد على الشارب «افحص المكونات المكتوبة على قارورة وتأكد من عدم وجود مادة تدعى سلفات لورييث الصوديوم «Sodium Laureth Sulfate» أو قد تكتب اختصار بالحروف الإنجليزية «SLS» حيث اتضح أن هذه المادة تدخل في تركيب جميع أنواع الشامبو لأنها تنتج قدرا كبيرا من الرغوة إضافة إلى قلة تكلفتها ورخص ثمنها. لكن من الحقائق المذهلة عنها أنها تستخدم في شطف الأرضيات وهي مادة قوية المفعول
كما أثبت بعض العلماء في أمريكا أنها يمكن أن تسبب مرض السرطان على المدى الطويل» ، وسمعنا ايضا أن هناك معجون اسنان يسوي فقاقيع ملغم بها المادة المسرطنة الله لا يبلانا.. أقول..سقها!!