«الأهلية» تنقص الرواتب وليس الرسوم!

الرواتب في المدارس الأهلية دائما قليلة، وإن كانت هناك مدارس أهلية تقدم رواتب جيدة إلا أنها تعتبر أيضا قليلة مع وضع الزمن والحياة وكل شيء غال، في المدرسة التي طبقت فيها لفترة بسيطة كانت رواتب الموظفات باختلاف الشهادات والخبرة والمهارات كلها «ألف ريال سعودي»، في منتصف الترم الثاني زي ما انتم عارفين صارت إجازة الأسبوع للطلاب والمعلمين، طبعا الإجازة كانت من الحكومة ومو المدرسة اللى فرضت على الموظفات الغياب ولا الموظفات اللى طالبين الإجازة ولو كان في دوام كان الكل راح يحضر، اللى صار يا جماعة أن المدرسة نقصت من رواتب المعلمات «200 ريال سعودي» على هالإجازة اللى هي أسبوع أي سبعة أيام وخلونا نقول خمسة أيام لأن الدوام من السبت إلى الأربعاء مو من السبت إلى الجمعة…
طبعا المعلمات اسكتوا وامرهم لله ولاحول ولا قوة الا بالله، وانا لا تعليق على الموضوع وكانت في معلمة معصبة تقول: «راتب الخدم اكثر من رواتبنا ولا بعد ياخذون راتب في الاجازة» …
من فترة كنت في المشغل وهناك كوافيرة كثيرة الثرثرة وخصوصا قضايا ومواضيع ومشاكل الحياة الاجتماعية ما شاء الله عليها، علما أن الكوافيرة جنسيتها «هندية» بس لها فترة في السعودية وتجيد اللغة العربية بطلاقة وبراعة ومهارة واتقان وتستاهل شهاده شكر وتقدير
وسألتني «توظفتي ولا لا»؟
وجلست اسولف معاها ووصلنا الى المدرسة اللى كنت اتدرب فيها وقلت لها عن قصة الراتب وان اسحبوا 200 ريال من إجازة الاسبوع وكنت اسولف وانا اضحك..
سكتت الكوافيرة لدقائق وهي تسمعني بصمت بعدين قالت: لم ينقصون من رواتبكم ليس لهم حق لان هذي إجازة حكومة مو اجازة المدرسة غايبة بنفسها..
قلت لها اي اعرف هالشيء بس ايش نسوي خلاص مشى الموضوع وانتهى..
قالت الكوافيرة الحكيمة: اذا هم ينقصون رواتب المعلمات على اجازة اسبوع لازم ينقصون من رسوم الطالبات اللى يدفعونها للمدرسة.. مو الأهالي يدفعون 12 ألف ريال سعودي لعيالهم في السنة؟ ليه ما ينقصون من الرسوم حقت الطالبات نفس الشيء، ولا هذا غير وهذا غير بعد؟؟
- بكل صراحة يا جماعة ما جاء على بالي ولا 1 % ليه ما ينقصون من رسوم الطالبات ولا بس حاطين حيلهم على الموظفات، كلامها كان على العين وعلى الرأس بس ما كان عندي رد لانها سكتتني وكان ودي اخذها وأوديها لين المدرسة تتفاهم مع الطاقم الإداري
أصحاب المدارس الأهلية: عندما تخصم من راتب المعلم لسبب تافه ولإجازات تفرضها الدولة أتمنى أيضا الخصم من رسوم دخل الطلاب وطالبات المدارس، إذا قدرتوا على خصم الرسوم في هذا الوقت إحنا ماعندنا أي مانع من خصم رواتبنا..
كثير هي من مجالات العمل أعتقد أننا نشوف الظلم ومع هذا نسكت!! ليه نسكت ما ادري؟
يمكن اكون جديده في مجال العمل الوظيفي ولكن في قانون او بالعقد مكتوب ان يخصم من الرواتب أثناء الإجازات الحكومية وهل هذا سبب مقنع؟
مدونة مضيعة بيتهم
http://mblog.ws/?p=4251