يفتح الله.. كل نص ساعة!

سمعتوا عن الإحصائية الجديدة اللي تقول إن السنة الماضية صار فيها حالة طلاق وحدة بس، ويا ليت ما أحد يفرح كثير لأن هذا جزء من السالفة بس، السالفة الكاملة تقول «حالة طلاق واحدة كل نص ساعة» وأنا ما كتبت لكم العدد الاجمالي لأنه طويل وأنا لازم أنقله رقم رقم واحرص اني ما اغلط فيه، وعملية زي هذي يمكن تاخذ وقت ويمكن ما يمديني اخلص منها الا قد تطلقت كم واحدة الله يعوضهم خير!
راعي الاحصائية يقول إن اغلب هالحالات تصير في السنة الأولى للزواج وهذا الشي الغريب في الموضوع، لأن هذي اكثر مرحلة مفروض فيها انسجام وتوافق، وتو الناس على أسباب زي الملل مثلا، لكن على العكس تماما، العالم هذولي عمليين ولا هم فاضيين يعيشون التجربة أو يحللون سالفة ان الحياة الأسرية تحتاج تفاهم والتفاهم يحتاج وقت، فقرروا انهم ياخذونها من قاصرها وبدل ما يقولون يا فتاح يا عليم.. قالوا «يفتح الله»!
زي ما قلت لكم انا ما كتبت الرقم عشان لا تروح علي مساحة المقال، لكن راح أخلي المساحة الجاية لكم تفكرون معاي، وش المنطق اللي يخلي الارتباط ينتهي والبيوت تتقفل بهالسرعة، خصوصا أن بعض الحالات فيها أبناء ما هم دارين وش السالفة، ولا راح يفهمون لو قارنا لهم بعض حالات الزواج بموسم البطيخ الصيفي أو بمسابقة «اكشط واربح»!