زي ما تيجي تيجي!

فيه ناس مهمين وغالين علينا، ويعتبرون شريحة وجزء من مجتمعنا اللي هم المرضى النفسيين ربي يشفيهم، يعانون من جهتين، جهة جهل مجتمعنا بالتعامل مع المريض النفسي وجهة ضعف الرعاية الصحية والمستشفيات المتخصصة بعلاجهم، بعض هالمستشفيات المتخصصة بعلاج هالناس، محتاجة أحد يهتم فيهم ويطورهم لأن اللي صاير فيهم يوجع القلب، كثير من أولياء أمور المرضى النفسيين يقولون ان مرضاهم قليل اللي استفادوا من جلوسهم عندهم، ولا أعتقد الا قلة قليلة تطلع من هالمستشفيات بكامل صحتهم النفسية، صدقوني لو عرفنا نص الحقايق عن هالمستشفيات غير نجلس نلطم للصبح، وانا ما ودي اعطلكم تجلسون تلطمون للصبح لان اللي يجلس يلطم للصبح مستحيل يقدر يروح لدوامه، واذا جت الساعة سبعة تلاقي أذانه لها وشوشة وعيونه حمرا يبي بس يحط راسه وينام، بعض مستشفياتنا النفسية الله يطول عمرها ويخليها لنا مكبرة الوسادة ومطنشة شي اسمه إنتاجية أو حتى طرق علاج حديثة، و بعض الاطباء اللي فيها ناس متخرجين من سنة جدي وهم بأنفسهم محتاجين دراسة عشان يعالجوا الناس لأن العلم تطور وهم مكانك راوح! عمركم شفتوا والا سمعتوا أحد من المسؤولين عن الطب النفسي قال دخل المستشفى الفلاني عدد كذا مريض وخرج منهم متعافى عدد كذا؟ مستحيل نسمع أرقام أو إحصائيات لأن الأمور عندنا قاعدة تمشي على نظام «زي ما تيجي تيجي»!