الغامدي: مفروض يوقفون حليمة من بدري

شاهد عيان من الشارع العام، على الأعمال الرمضانية ونجومها.. له وجهة نظره تجاه ما تابع من الأعمال، وله رأيه الخاص بالطبع..
أيمن الغامدي «22» عاما.
مبروك عليك الشهر.
علينا وعليك.
أكيد إنك تتابع التليفزيون هالأيام بكثرة؟
إيه صح هذا موسم ولازم نتابع ونشوف وش الجديد.
يعني ما انت مركز على عمل واحد؟
أكيد القنوات فيها «500» عمل ولازم نتنوع وحنا نشوف.
مثل إيش تتابع؟
طاش ما طاش وسكتم بكتم وشر النفوس، وفيه مسلسل تاريخي نسيت اسمه.
ما تلخبط من كثر المتابعة؟
أكيد وأحيانا أتابع عمل مرتين بس وش نسوي.
وش أكثر حلقة شدتك في رمضان؟
عندك بعض حلقات طاش، وحلقة المجاهر في سكتم بكتم حليوة ما عليها.
وقفوا برنامج مسلسلات حليمة وش رايك؟
مفروض يوقفون حليمة من بدري لأن ما ادري وش ذا البرنامج التافه، واستغرب من قناة إم بي سي إنها معطيتها وجه.
وش رايك في أعمالنا السعودية في الأعوام الأخيرة؟
تبي الصراحة؟ مستواها مرة فوق ومرة تحت.
ليش؟
أهم شي إن الفنان ما يسوي خفيف دم وهو ثقيل طينة لأن هنا المشاهد يرتفع ضغطه.
بس الاعمال السعودية صارت متابعة أكثر من أول..
إيه، تطورنا بس عندك غشمشم ما فيه أمل يتطور.
أها، يعني ما عجبك؟
ما عجبني ولا لقيت واحد عاجبه.
من اللي يشدك من الممثلين في الكوميديا ولا التراجيديا؟
في الكوميديا القصبي بلا منازع، أما التراجيديا يعجبني جمال سليمان.
مسلسل تمنيت أنه يكون له جزء ثاني؟
المشكلة كل الأعمال صارت أجزاء وما أتذكر.
طيب مسلسل تشوف إنه من الأفضل وقفه؟
أي عمل يكون ثقيل دم أتمنى أنه يتوقف.
شكلك تحب الأعمال اللي فيها جرأة في الطرح؟
الجرأة مطلوبة ولازم أعمالنا تكون جريئة في معالجة القضايا.
الناس يقارنون المسلسلات السعودية بالخليجية وش رايك؟
العمل عمل سواء سعودي ولا خليجي ولا ان شاء الله هندي، أهم شي القصة والأداء.
يقولون جوائز برامج المسابقات تغري وش رايك فيها؟
والله المسابقات ما وراها إلا الخساير، تخيل يفوزون عشرة أشخاص ومليون تذبحهم الفواتير.
وش أكثر برنامج تتابعه؟
أحب سباق المشاهدين.
وحروف وألوف كيفك معاه؟
أحيانا أتابعه.