أريد طائرة حتى اكلم الشباب من لديكم فيطمئنون

وفيما يلي مقاطع مما تضمنه ذلك الاتصال:
المكالمة الهاتفية
¶ الأمير محمد بن نايف: السلام عليكم الاخ عبدالله.
¶ المنتحر : نعم نعم.
¶ الأمير محمد بن نايف : كيف الحال .. القوة.
¶ المنتحر : الحمد لله كيف حالكم.
¶ الأمير محمد بن نايف: بخير كل عام وانتم بخير.
¶ المنتحر : وانت بخير ان شاء الله.
¶ الأمير محمد بن نايف: كيف صحتك.
¶ المنتحر : مبروك رمضان.
¶ الأمير محمد بن نايف: الله يبارك فيك عسى ماتعبتوا.
¶ المنتحر : الحمدلله.
¶ الأمير محمد بن نايف: وشلون اخوك ابراهيم عساه طيب
¶ المنتحر : طيب الحمد لله
¶ الامير محمد بن نايف: ابشرك ترى الوالد والوالدة كلهم طيبين ولله الحمد امورهم زينة وكل شيء زين
¶ المنتحر : اللهم لك الحمد
¶ المنتحر : ونسأل الله عز وجل ان يتمم.
¶ الأمير محمد بن نايف: اللهم آمين اللهم آمين.
¶ المنتحر : عسى الله بيسر الامور.
¶ الأمير محمد بن نايف: ابد الأمور متيسرة ما دام الانسان يحط الله بين عيونه اموره متيسره.
¶ المنتحر : ان شاء الله.
¶ الأمير محمد بن نايف: في ذهنك شي ودك تسألني اياه.
¶ المنتحر : والله علي أني اقابلك.
¶ الأمير محمد بن نايف: انا وانا اخوك في جده وانت بعيد شوي محلك.
¶ المنتحر : انا ودي اقابلك حتى اعطيك الموضوع كامل لك متى ماتيسرت عرفت.
¶ الأمير محمد بن نايف: هو أهم شي الان عندنا اول شي ابسأل سؤال تجاوبني عليه جواب لأطمئن.
¶ المنتحر : أبشر.
¶ الأمير محمد بن نايف: طمني عن زوجة سعيد وعن الصغار عسى ماجاهم شي.
¶ المنتحر : لا ابد طيبين مره اللهم لك الحمد.
¶ الأمير محمد بن نايف: هذ ولا وانا اخوك لهم اهل فلابد تراعونهم قبل كل شي. انتبه عليهم تراهم عندي اهم منكم اقولها لك بصراحة.
¶ المنتحر : بيض الله وجيهكم.
¶ الأمير محمد بن نايف: الحين وقلك حطها في وجهي ابيك تطمني عنهم قبل كل شي.
¶ المنتحر : اعجبنا وضوحكم معنا عرفت حتى الشباب مستغربين من تعاملكم.
¶ الأمير محمد بن نايف: ليه انتم عيالنا ليش مستغربين هالتعامل.
¶ المنتحر : بيض الله وجيهكم.
¶ الأمير محمد بن نايف: هذا واجب احرصوا ترى الاشرار يبون يستغلونكم في كل أمر حطوا الله بس بين عيونكم وتعالوا لديرتكم.
¶ المنتحر : وهذا رمضان بإذن الله رمضان خير.
¶ الأمير محمد بن نايف : آمين آمين ان شاء الله دائم.
¶ المنتحر : والله ان شاء الله نسأل الله ان يكفينا الشر ورمضان هذا رمضان خير.
¶ الأمير محمد بن نايف: آمين
¶ المنتحر : ومتفائلين ان رمضان هذا يعني بيكون نقله.
¶ الأمير محمد بن نايف: بحول الله اول نقله وانا اخوك تقر عين اهلك فيك هذا اول شي .. ثانيا انا والله ماني كاذب عليك ودي المرأة هذي وعيالها يجون سالمين غانمين لأن النساء عندنا اولويه في كل شي.
¶ المنتحر : صدقت والله.
¶ الأمير محمد بن نايف: والله اقولك والله يخيروني هالحين بينكم كلكم والاهم كان لا انتم اقعدوا وخلوها تجي.
¶ المنتحر : صحيح والله لو تشوف كيف بنته الصغيره وكيف يوسف يعني نسأل الله ان يتممها على خير.
¶ الامير محمد بن نايف: إن شاء الله يجون وتقر عين أهلهم فيهم والمرأه تجي عند والدها وأسرتها . فالهمام ما عندك هالحين الا الهمام تعلم اخوانك اللي بيجون قبل ما يستغلونهم الاشرار بدون أدني شك.
¶ المنتحر : بإذن الله حنا نحيكم في الله وان الامور بأذن الله تتم وتتيسر.
¶ الأمير محمد بن نايف: أبشرك الامور زينه .. وأنا يهمني أهم شي تقر عين والدتك فيك ووالدك هذولا بعد مالهم ذنب .. والدك والدتك يتجلدون قدام الناس مايبون يشعرون أحد أنهم متأثرين ولكن من جوه تعرف قلب الوالد.
¶ المنتحر : انت كلمتهم.
¶ الأمير محمد بن نايف: والله دائم اسأل عنهم ونكلمهم باتصال ولا لي فضل فيها.
¶ المنتحر : انا كان ودي أدق عليهم.
¶ الامير محمد بن نايف: دق عليهم بس اذا ما كان ما يؤثر عليهم انهم يحكون عند احد.
¶ المنتحر : هذي شي والشي الثاني ودي اكلم انا واخوي ابراهيم مره وحده.
¶ الأمير محمد بن نايف: احسن تدري وراه .
¶ المنتحر : لأن لو كلمت لحالي يمكن يخافون من شي.
¶ الامير محمد بن نايف: الوالد لا ممكن يكون متفهم لكن والدتك لو تكلمها واخوك ما كلمها يتهقى فيه شي.
¶ المنتحر : والله ودي اقابلك اشرح لك الوضع كامل.
¶ الأمير محمد بن نايف: ابد حياك الله لك مني اذا جيت اقعد انا واياك وكل منا يعطي اللي عنده رفيقه لكن اهم شي الجماعة لايبطون ما ادري وش الاوضاع عندهم.
¶ المنتحر : الجماعة قالوا الشيخ سعيد عجل تقابل انت مع الامير ، وتكلم بعض الشباب متخوف شوي.
¶ الأمير محمد بن نايف: وش متخوفين منه.
¶ المنتحر : مدري بعضهم متخوف.
¶ الأمير محمد بن نايف: معليش محقين لكن انتم ماسألتوا عن محمد تراه طيب وبخير وفي بيته.
¶ المنتحر : جانا الخبر والحمد لله بعد الخبر ارتحت كثير وقالوا تكلم الامير بنفسه ويكلم الشباب وبإذن الله يعطيهم وجه.
¶ الأمير محمد بن نايف : ترى الا هالحين لو فيه حق خاص ابعلمك امورنا كلنا تتبع الشريعة وقد نكون مقصرين في بعض الامور ولكن عن غير قصد وما فيه احد كامل خلني اكون معك صادق .. لكن لو الانسان قاتل له كان فيه حق خاص ما اقدر اوعدك فيه لين اهل الحق يتنازلون.
¶ المنتحر : بيض الله وجهك.
¶ الأمير محمد بن نايف: ولكن الحمدلله اللي اعرفه الان انكم ما عندكم حقوق خاصه على احد.
¶ المنتحر : فإذا قدرت بأسرع وقت ترسل طائرة او اي شي بحيث اكلم انا الشباب من عندك.. لأنه اذا كلمتهم من عندك بإذن الله عز وجل خلاص بيطمئنون.
¶ الأمير محمد بن نايف: خلاص اللي ودك.. انت اللي تقيم هذا الوضع اذا كان الوضع ينتظر الى يوم تجيك الطياره وبتجي الله يحييك.
¶ المنتحر : بيض الله وجهك .
¶ الأمير محمد بن نايف: واذا كان لا ما ينتظر لا والله الهمام على اخوانك وخلهم يجون.
¶ المنتحر : اجل خلني اكلم ثامر وارد عليك.
¶ الأمير محمد بن نايف: كلم وشوف وشاور وانا اخوك بس اهم شي لا تكلم الوالده الين يصير ابراهيم عندك.
¶ المنتحر : ابشر .. وتكفى انك تسامحنا لانها والله انها يعني ما كانت.
¶ الأمير محمد بن نايف: لا تنخاني يا رجال اني اسامحك انت ولدنا وابرك ساعة نبي نكسبك وتعودون لا احد يستغلكم هذا اللي نبيه.
¶ المنتحر : بإذن الله.