مسجد الشافعي يا ناس

دحين انت لازم تخليني ادمع وابكي وانت مدخلني على اسواقنا القديمة في جدة التاريخية يعجبك كده لما تقلب عليا المواجع؟ ايوه يعجبني لازم تدمعي وتبكي على تراث جدة كيف كانت وكيف صارت وخاصة في المنطقة التاريخية بيوت انهدت وانحرقت بسبب الاهمال واخليكي كمان تذكري كيف كنا عايشين في هادي الازقة وفي هادي البيوت المرصوصة جنب بعض مع ناسها واهلها الطيبين اللي كانت قلوبهم كلها احترام وتقدير ومحبة وطيبة، الجار يحترم جاره والصغير يحترم الكبير حتى اصحاب الدكاكين اللي اغلبهم كانوا من اهل البلد كان بينهم احترام وتقدير وحب اذا استفتح واحد منهم برزقه وجاه زبون تاني يقوله روح اشتري من الدكان اللي جنبي انا استفتحت خليه هوه كمان يستفتح هدا ابو بزوره كانت القلوب على بعض مو زماننا ده اللي الحسد والجشع عمى قلوبهم نسأل الله السلامة، طيب يا سيدي كفاية برم ولفلفة تراك وجعتلي قلبي ورجعتني للماضي الجميل. المهم ونحنا داخلين على سوق الجامع اللي في حارة المظلوم تجي عيني على ترميمات مسجد الشافعي العتيق واللي جنبو سوق الصاغة والفضيات واللي بيصنعوا النحاس وقلت في نفسي معقولة الى اليوم ما خلصت الترميمات حق هدا المسجد الجميل اللي كان يمتاز بحجمه الكبير ونقشاته الجميلة وساحته المكشوفة للتهوية والانارة الطبيعية، مسجد الشافعي منارته من اقدم منارات المساجد اللي موجودة في مدينة جدة التاريخية لانه عمرها اكتر من 800 سنة واللي بنى هدا المسجد الملك المظفر يوسف بن عمر بن علي احد ملوك اليمن الايوبيين. وقبل خمس سنوات صدر أمر بترميم المسجد وتجديده حسب شكله الخارجي والى اليوم ما انتهت هادي الترميمات ولا حتى التجديد في هدا المسجد العتيق ولكن كل الي بنشوفه حسب كلام جيران المسجد انه العمل في ترميمه ماشي زي مشية السلحفه وفي الاخير اتقفل وتوقفت الصلاه فيه واللي يزعل ويفور الدم ويوجع القلب انه اللي ماسكين مشروع ترميمه وتجديده سكتم بكتم لا حس ولا خبر والمتضرر من هادي الحكاية الاوادم اللي بتصلي في هدا المسجد من اصحاب الدكاكين والبيوت هدا غير اللي اضرروا من اصحاب الدكاكين الملاصقين للمسجد اللي فضوا دكاكينهم وانهدمت بحجة انه المشروع مدته سته شهور بس وحيرجع المسجد زي ماكان واحلى كمان لكن اللي حصل انه من خمس سنوات ومشروع المسجد زي ماهوه لا ترميم ولا تجديد ولا بطيخ والمصيبة الى الان نحنا مو عارفين من هوه المتسبب في تاخير ترميم هدا المسجد العتيق عشان كده بتمنى ان الجهات المختصة يشوفوا حل لحكاية مسجد الشافعي اللي كان لؤلؤة تزين حارة المظلوم في الليل والنهار وعيشوا كتيييييير تشوفوا كتييييييير.