والنهاية يا شركة المياه

بالبلدي الفصيح

ايش هوه دا يا سيدي كل يوم حتجي كدا على المغرب؟ ، ايش تبغيني أسوي.. نحنا حقون القطاع الخاص مدمورين من الدوام دا ، وشارع فلسطين كمل الناقص مقفل من أوله لآخره عشان مشروعهم الجديد اللي شغالين فيه واللي حيستمر لمدة سنتين ونص، والمفروض إنه هدا المشروع والمشاريع التانية اللي بنشوفها في جدة المفروض تكون موجودة من زماااان .. المفروض يكون عندنا قطارات من زمان والمفروض يكون عندنا مترو أنفاق من زمان عشان تنفك الخنقة اللي في البلد لكن الله يسامح اللي كان السبب، وزي منتي شايفة للأسف جالسين نمشي زي الفيران من زقاق لزقاق ومن شارع لشارع عشان نوصل لبيوتنا وأعمالنا.. ما علينا قومي جهزي سفرة الغدا خليني أتغدى وأكتب مقالي لا يزعل عليا حبيبنا عبد الله العقيلي وأسمع منه كلمتين تصرفد اللي ما يتصرفد.. وحتكتب عن ايه يا سيدي ؟ ، والله ياستي من فترة طويلة والناس بتشتكي من شركة المياه عليها حركات كدا مو طيبة والحبايب حقونهم شغالين زي الحلاوة ما في إلا سلخ وتسجيل في الغرامات على ملاك العماير والعقارات.. حلال حرام ما تفرق معاهم ويا ويلوا اللي ما يكتب غرامات (بس بيني وبينك يستاهلوا ملاك العماير مايشوفوا نفسهم شغالين سلخ في الإيجارات على عباد الله ولمن تجيهم غرامة من شركة المياه يجلسوا يلطمووا .. بس تضحك على مين يا عم قدهم لاطشينها من المستأجر الغلبان).. ما علينا نسوي المعروف ونرميه في البحر على الله يثمر فيهم .. المهم ياستي شركة المياه زي ما قلتلك جالسة بتوزع في الغرامات على ملاك العماير على أقل قطرة موية موجودة قدام عمايرهم حتى لو كانت ما تخصهم وتكون مدحدرة من عند جيرانهم المهم أكتب غرامة وبس .. وفيه واحد من الحبايب اشتكى وبيقول: يبو فتو عشان رفعت كم بلوكة حوالين العداد أعطاني غرامة ب 1000 ريال مكتوب فيها (إخفاء معالم العداد) شكلو كدا والله أعلم إنه حبيبنا صاحب العماره أخفى معالم (قرطبة) ، وبعدين يا شركة المياه أعلنوا للناس وخلوا عندكم شفافية في قراراتكم وغراماتكم عشان أصحاب العماير يعرفوا راسهم من رجولهم مو يجي اخينا اللي بيقرأ العدادات ماشي في الشارع زي السيخ ويكتب من راسوو قيمة استهلاك الموية ، ترى نحنا اليوم في دنيا وبكرة حنكون في الاخرة وكل واحد وعملو ، وبعدين هادي المويات اللي بتتسرب في الشوارع من أصحاب الوايتات التابعين لكم من يحاسبها وهية جالسة بتبهدل الشوارع بمويات التحلية ومويات المجاري والا انتو على راسكم ريشة. وعيشوا كتيييييير تشوفوا كتييييييير.
هرجة:
يا أصحاب العماير والعقارات انتو كمان عشان لا تجيكم الغرامات لأجل الله خلو بالكم من طفح خزانات الصرف الصحي اللي بهدلت الأحياء ونكدت على الجيران والناس.
abofatoo@hotmail.com
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة