الحبايب في شركة الكهرباء ما يهنأ لهم بال إلا لما يعكننوا على المشتركين، ولا يعجبهم العجب ولا الصيام في رجب إلا لما يبهدلوهم آخر بهدلة لما يتأخروا في سداد الفاتورة شهر والا شهرين إلا وتفصل الكهرباء عليهم وحلني لما يرجعوا الكهرباء للأوادم حيمرمطوا المشتركين آخر مرمطة اليين يرجعوا لهم الكهرباء، وطالما الفاتورة ما اتسددت احلم يامليح ان الكهرباء ترجع لك، لأنه حقهم حق وحق المشتركين مرق لأن فرق الصيانة حقتهم جاهزين ومافي إلا فصل في الكهرباء يعرفوا ياخدوا حقهم بالتمام، لكن يشوفوا حل للمصايب والبلاوي اللي بيسببوها للمشتركين يفتح الله.. حتقولوا إشبك يبو فتو زعلان على شركة الكهرباء؟.. أنا أقول لكم ايش الحكاية وانتو بعدين احكموا براحتكم وتشوفوا مين الغلطان.. شركة الكهرباء ياحبايب من كم شهر عندها موال جديد هدا الموال الجديد اللي جالسة شركة الكهرباء بتغنيه مع المشتركين بس بيني وبينكم هدا موال آخر جمال ورستكة بس مو على مقام البنجكا ولا مقام السيكا هدا على مقام ظلموه .. هدا الموال الجديد بيختلف اختلاف كبير عن كل المواويل اللي بنسمعها في الساحة الغنائية موال اسمه (فاتورتك تجاري والا سكني) من كلمات وألحان اللي بيقروا العدادات في شركة الكهرباء اللي جابوا للمشتركين الجنان من قيمة الفاتورة اللي بتجيهم وهدا الكليب قصدي الموال نزل في الأسواق قصدي لأصحاب العماير زي قنبلة الباتريوت .. قبل 5 أشهر وشركة الكهرباء لا أرى لا أسمع لا أتكلم. والمشتركين كل يوم سردادي مردادي على شركة الكهرباء وشوف عاد الحوسة والغشنة اللي بتصير هناك وكلو من تحت راس اللي ألفوو الموال .. شقق سكنية تجي الفاتورة لأصحابها تحت مسمى تجاري لأنه اللي بيقروا العدادات بيشوفوا انه تحت العمارة دكاكين ومعارض ويشمطوا أم العدادات كلها تجاري وما يفرقوا مابين تعرفة عدادات الدكاكين والمعارض وبين تعرفة الشقق .. وزي منتو عارفين التعرفة الكهربائية مابين الشقق السكنية والمحلات التجارية تختلف كتيييير لكن الحبايب في الكهرباء ما تفرق معاهم اطبع الفواتير ووزع ياموزع واسلخهم يا مليح وخلووهم يسددوا وبعدين نتفاهم مع المشتركين .. وصاحب الشقة المستأجر الغلبان ياغافل لك الله بيسدد الفاتورة لأنه خايف تنفصل عليه الكهرباء وشركة الكهرياء ما ترحم أبرد ما عندها أنها تفصل الكهرباء على المشتركين، لكن ترجع الكهرباء للمشتركين في نفس اليوم يفتح الله. والمصيبة إن الفاتورة اللي كانت تجي للمستأجر في الشهر (200ريال) صارت (500ريال) وكلو من تحت راس الموال الجديد ( فاتورة تجاري ) واللي بيسمعوه للمشتركين من فترة كم شهر، وشوف عاد المستأجر الغلبان قالبها كعب داير كل يوم والتاني هوه بيراجع الحبايب في شركة الكهرباء يبغى يشوف حل لحكاية الفاتورة الجديدة اللي تغير اسمها من سكني لتجاري واللي قصمت ظهره وهوه بيسدد فيها كأن الغلابا اللي في البلد ناقصين مصاريف ومو عارفين إنه كل واحد منهم بيقول (يايدي فكي حلقي). ياحبايبنا يللي في شركة الكهرباء شوفوا حل للمصيبة هادي اللي بهدلت المشتركين وعكننت عليهم حياتهم. وارحموا من في الأرض يرحمكم من في السماء .. وعيشوا كتيييير تشوفوا كتيييير. [email protected] !!Article.extended.picture_caption!! للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
