هات الهرجة .. جاب «العيد»

صوت عالي

قبل يومين كنا في مركاز العمدة متجمعين وكل الهرجة حولين الكورة جلس سيد صاحبي يتحكى عن كورة زمان ويقول راح زمن الكورة كان اللاعب يسحب ويرقص والكورة في ارجوله زي اللبانة بفن ومهارة وكل همه الجمهور اللي جاي من الظهيرة في داير مايدور من الملعب في ساحة اسلام وفجأة قال بالله عليكم قفلوا على الموضوع تعبتوا قلبي زي كورة زمان مافيه.
قلت أنا اسمحلي ياعمدة اقول الهرجة دغري ولا تبحلقوا في الهرجة ومافيها.
ما نبغى نلوم المنتخب .. ما نبغى نلوم اللعيبة .. ما نبغى نلوم المدرب ..ما نبغى نرمي اللوم على أحد .. خلاص زهقنا من دا الأسلوب .. مافي وقت للهرج الفاضي وتضييع الوقت .. نبغى نشتغل ونأسس جيل جديد .. نبغى ننسى القديم .. ننسى إنه لنا ماضي يشرف .. ماضي جميل .. ذكريات حلوة .. تلمع .. زي «الألماس» ..
نبغى نأسس منتخب من المدرسة .. من البراعم .. لاعب من لمن كان طالب وهو بصحة طيبة .. ياكل طيب .. يتمرن طيب شي مرتب .. يتأسس عليه ويصير حاجة مشرفة .. المشكلة الحقيقية عندنا في الرياضة المدرسية .. ياناس ياهوووووه خلونا نقارن بين أجسام أبنائنا وغيرنا من الجنسيات التانية .. إيش الفرق .. يعني بيأكلوا هم سلطة زايدة والا اللحمة سبيشل .. الرياضة المدرسية عندنا كل مالها على ورا .. والدليل إنه أصبح لها كتاب يُدَرَّس وينشغل مدرس التربية البدنية بتدريس الكتاب والا تدريبهم .. ينشغل بالكتاب عن التمارين والأشياء اللي تفيد صحتهم ..هادي حاجة طبيعية ومفروغ منها ..
نبغى نأسس أكاديميات في كل نادي .. تفرِّخ لنا أجيال جديدة تحب الكورة مِن جدْ مو نص ونص .. يكون اللاعب عارف ايش ياكل .. إيش ينفعه وإيش يضره .
لازم نشعل في عيالنا الروح الرياضية .. اللاعب حتى لو قربت المباراة تخلص يلعب يحاول .. يقدم أحسن ما عنده .. يحس إنه فيه أحد بيتفرج عليه ومؤمل فيه ..
على العموم اعتبروني بأفكر بصوت عالي.