توب بجيبيييين

بالبلدي الفصيح

قبل أسبوع تقريبا كان في إعلان منشور في جريدة محلية ما حقول اسم الجريدة عشان لا يروح البنك ويرفع عليا قضية تشهير لاني خبصت عليهم الاعلان وانا مو ناقص المهم الاعلان خلاني اضحك واكركر من جوة قلبي واقول بيني وبين نفسي من جد ضحك على الدقون.. انا عارف حتقولوا ايه هوه ده الاعلان يبو فتو ؟ طولوا بالكم وابلعوا ريقكم وانا حقولكم .. الاعلان اللي كان منشور في الجريده عباره عن صورة كبيره على طول الجريده حاطين فيها صورة أدمي لابس توب لكن بجيبيين عمري في حياتي ما شفت توب بجيبين ما قلتلكم ضحك على الدقون المهم نكمل في الجيبين في رزم من ام خمسمية ويقولك راتب اساسي وراتب اضافي.وهدا كله مايصير الا اذا دخلت برامج التمويل والاستثمار حقتهم وانتو عارفين انه ده كله سحبة رجل... يارجل تروح على ابو زعبل من كتر الديون اللي على الاوادم او سحبة رجل على على مقبرة من المقابر من كتر ارتفاع الضغط والسكر وقسطرة القلوب اللي بيعيشو المديون شايفين كيف البنوك تحب تجرجر الاوادم وراها يعني كانه الاوادم ناقصه مصايب وديون غريب حال البنوك عندنا بنوك ما يهمها الا قد ايش تلهط من الاوادم كل يوم والتاني بتشوف اعلاناتها في الجرايد اعلانات على بطاقات الائتمان واعلانات على قطع الاراضي وشقق التمليك والقلل والسيارات ولمن تروح تسأل عن هادي الاشياء وكيف بيحسبها البنك راسك يشيب من كتر العمولات اللي بياخدوها تسأل عن الفله يقولك العموله مليون بس تسأل عن الشقه يقولك العمولة خمسمائة الف بس وعذرهم طول فترة السداد اقولك بنوك ماترحم طالعة واكله نازله واكله عشان كده ارباحهم في الربع الاول من السنه بتلاقيها بالملايين ولما تجي نهاية السنه تلاقي ارباحهم وصلت بالمليارات والمصيبه مو هنا المصيبه في موظفينهم الغلابا ينكرفوا كرف ويشتغلوا شغل ولمن يجي توزيع البونص ما يعطوهم الا الفتات وكلوا بيروح لاصحاب البشوت ولاصحاب الكرفتات وزي ما بيقول المثل ( باب النجار مخلع ) ما علينا نرجع لموضوعنا نبغى من البنوك انها تقوم بخدمات طيبه للمجتمع يعني بالبلدي عمري ما شفت بنك ساهم بمشروع سفلتة الشوارع وحيكون الشارع باسم البنك او مشروع بناء المدارس او مشروع بناء المستشفيات او مشروع بناء المساكن لذوي الدخل المحدود يعني البنك يقوم ببناء فلل او عماير سكنية وتوزع شقق على الناس اللي تعبت وهيه بتدور على سكن طالما وضع الاراضي لا يسر لا عدو ولا حبيب كل مالها في ارتفاع والمواطن البسيط كيف حيقدر يبني او يشتري ارض طالما الاسعار وصلت لارقام فلكية بس بشرط تكون اسعار الفلل والمساكن مقدور عليها واتمنى من البنوك انها تساهم في بناء الاربطة للعجزة وتقوم بتقديم مساعدات مالية خيريه لها قيمتها مو مساعدات الواحد يستحي يتكلم عنها وياريت تقوم بمساعدة الشباب على الزواج بدفع تكاليف تأثيث الشقه ومساعدتهم في دفع رسوم القاعات وبكده نحس انه البنوك واقفه مع ابن البلد في همومه ومشاكله وعيشوا كتييييير تشوفوا كتيييييير
هرجه / فين المحامين وجمعيات حقوق الانسان عن هدا التلاعب اللي بتمارسوا هادي البنوك في حق المواطن الغلبان
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة