البوح

أعطتني الصافي من الروح للروح
وعز الله اني ما تجملت فيها
أهملتها والقلب بالحيل مجروح
مجروح من حرقة فؤادي عليها
ياما سعت لمواصلي وين ما اروح
ما تنقطع عني ولو ما ابيها
جتني فرح وانا الذي جيتها نوح
جت بالسرور وبالمعاناة أجيها
أهدتني الراحة وانا اهديت ساموح
وتشهد على شين الجزا وجنتيها
تكتم ولكن تنفجر لحظة البوح
وتبكي ويمحي الدمع مترف يديها
أشغلت داخلها على غير مصلوح
ولا شكت مني وانا مبتليها
وش ذنبها تحيا مع هم وجروح
دام اشترتني ليه انا ما اشتريها
الواجب ارخص لاجلها العين والروح
مادام انا اللي حط الاوجاع فيها
ضيف الله المطوع