جن ليلي وحادي الليل صاح يا شقي ابشر بليل شقي ابشر بليل ما عقبه صباح كافر طاح بيدينه تقي ليلة ترمي بكبدك رماح تختلف بالضلوع وتلتقي وانثنى الحيل بهمومي وطاح وكل طاري مسك في مخنقي يالهواجيس لك صدري مباح ارعدي بالحنايا وابرقي ويالشعر دمي الليلة قراح اشربي يالقصيدة واورقي ودي البسك يالعبرة وشاح لين يحتاس دمعي بعرقي من بكى قالوا الناس استراح ليه ما ابكي على كثر قلقي كان لي دمع وين الدمع راح ياعيوني ورى ما تغرقي كان لي وجه وعيون سماح وش كثر ضاع مني وش بقي غير شعر وهواجيس وجراح وشيبة تبتسم في مفرقي وحلم اقفى تذريه الرياح يزدريني ويلعن منطقي وليل ليا رحل حاديه صاح يا شقي قلت لك ليلك شقي
