متبعثر إحساسي!

الشعر لايغني ولا يوكلك عيش
قالت لي أمي يوم توي صبيّه
ماتدري إني مااتنفس ولاأعيش
إلا ونبضاتي حروف أبجديه
عقلي جسور وقلبي إنسان درويش
متبعثر احساسي ولا له هويه
أنبّش قبور المعاليق تنبيش
و أبحث مابين أنقاضها عن خبيه
أنا أموت وفوق راسي مية ريش
ولا أعيش الموت و النفس حيّه
مدري أصنف حالتي مهزلة طيش
ولا اعتبرني جد طفله غبيه
تعبت مع نفسي وهي ردها ليش ؟
تعبت أسويني معي آدميه
حتى كُبرت و مر هالعمر بشويش
نفس الفكر والفلسفه هي هيه
على سفينة حلم صبر الطواويش
مجدافي ضلوعي الكبار الأبيه
أقاوم أحلامي ولو دكها جيش
بنيتها من باب حب و حميه
جوعى أمنياتي حافيه تلبس الخيش
لكنها بعيون قلبي هديّه
قد ايش تعني لي و للحين قد ايش
أحس لي في نفس جيلي مزيّه
ماكنت أشوف الي كتبته خرابيش
بالعكس كنت أعتبره أعظم قضيه
و أنا أدري إن الشعر ماوكل العيش
هو مثل ما قالت لي أمي أسيّه
ماتدري إني ماأتنفس ولا أعيش
إلا ونبضاتي حروف أبجديه