احتكار الرأي

احتكار الراي .. لا يعني قناعة
والجدال احيان ماهو في محلة
الصغير اللي يساوم في البضاعة
لا يطب السوق .. وايدينه مغله
وش بلا البحّار ما يحكم شراعة
قبل يغرق بالبحر .. ويضيع كله
خبروه اليا .. توسط بالجماعة
يعرف التاريخ في دقة وجلة
الجراد اليا دخل بأرض الزراعه
موت المحصول واودعها مقله
التعنجه و التكبر .. و القطاعة
من نقلها وسط صدره فيه عله
الرجل ماهوب في مدة ذراعة
الرجل اليا زعل ماهان خله
الوجيه كثار .. و اكثرها مجاعة
ما تساوى بالوجيه المسفهلة
من يهذري بالمراجل والشجاعة
خبره صكات .. بقعا تستحلة
وان تداعى بالكلام وقال داعه
لابحلت تشوف بالشارب وبله
الرجوله بالزمن ماهيب ساعة
ماتجي بصحين تمر وخشم دله
لايغرك منظرة وان جاك راعه
يعرف الرجال واخلاقه إجبلّه
سمعة الرجال في وسط الجماعه
فرض عين وشرع دين وطيب مله