هيفاء ماجد المشاري

هناك أمور كثيرة تثير الحنق والضيق وودي أشرشح من هم وراءها ونظرا لفوات مناسبتها أو وجود موضوعات أسخن أضرب عنها صفحا بالشعبي (أطنشها) ومن ذلك تصريح لكولن باول قبل رمضان حول مشاركة الحريم في الانتخابات حز في نفسي أن ما فيه أحد (أكله تبن) عليه يقول تقلقلت حنوكه: يتعيّن على الحكومة السعودية أن تحسم هذه المسألة..(أظن هذا موشغلك..الشيوخ أبخص).. وأنه ينبغي السماح للمرأة بأن تشارك في الانتخابات (وأنت شكارك في الموضوع؟).
كما تعلم فإن لكل أمريكي الحق في التصويت في الانتخابات (أجل عندنا اللي يصوت دايما الحريم)... أعلم أن النساء السعوديات يرغبن في المشاركة في هذه الانتخابات (ماقلنا لك.. وإذا عن طريقك ترى هونا)الخ. حقيقة تصريح هذا (حوم كبدي) وفور دمي.. أنت شكو وانتخاباتنا ؟ مين وكلك للحكي عنا ؟ وإذا قلنا لك مانبي نشارك ؟ بعدين حنا وحكومتنا نتباصر اطلع منها انت ( وخمتك) وهي تعمر.. يعني لازم نصير نسخة منكم ؟ وين خصوصيتنا وثقافتنا ؟ كنت أتمنى أن تقوم وحده نشمية وترد عليه ردا يبرد وجهه وتقول له: جعلك الماحي.. شي من طريقكم مانبيه.. والعب بعيد أزين لك ..لكن..
ولما سمعت خبر استقالته قلت هذي والله حوبتنا فيه ..الله لا يرده .. حصاة وذلفت عن درب المسلمين .. وتوي بستانس الا يطلع علينا بوش ويقول: عينت الخالة / كونداليزا رايس مكانه في الخارجية(عرفتوها ماغيرها).. قلت (إنا لله وإنا إليه راجعون) ..وش قصد بوش بهالقرار.. أكيد أوصلوا له مقالتي الماضية عنها وعنه وزعل ويبي يحرني و يقهرني ؟؟ مدري وش اللي محبب بوش فيها ؟.. ينًقلها من منصب الى منصب .. يعني ما لقى بأمريكا إلا هذي؟؟ وللعلم هذي اللي بتكمل الناقص.. والله إن تجيب العيد والجمعة في العرب والمسلمين وبتقولون ماقالت هيفا.. الايجابية الوحيدة في القرار هي خلو منصبها كمستشارة للرئيس اللي كنت أطمح له .. وشكلي أبرسم على منصب وزيرة الخارجية بعدها هذا إذا ماطيرتها قبل نهاية السنة..أنا وراها والزمن طويل..