صوت الصورة

هذا تراثٍ واضح شوف الاعيان
تراث ماضي حاضرٍ في معانيه
يوم الركايب فوقها شدو عنان
كانت وسيله من قديمٍ سوانيه
أعادها التاريخ في مجد وألوان
واليوم منظرها يحقق أمانيه
حمد عبدالله الوايلي - حوطة سدير
تراثنا حافل بتسطير الأبطال
اللي بنو دوله بها الأمن مضمون
نسعى بتعريف الزمن كل الاجيال
اللي على منهاج الأجداد يمشون
خالد ناصر المخيمر – روضة سدير
كل عام نشوف آثار بفكر وتجديد
يحكي عن الماضي ويفيد الأجيال
الجنادرية تراثها كم بها يزيد
جمالها تعجبك هي مضرب أمثال
ياما تذكرنا بالرجال الصناديد
ذكرى هل الطولات ذربين الأفعال
محمد عبدالعزيز الخنيفر - أشيقر
يرف قلبي للتراث وطواريه
وأرتاح إلى شفت المباني القديمه
عشق المطايا باينٍ ما نخفيه
وفيها من الخالق أمورٍ عظيمه
نحب ماضينا ولا شك نغليه
عاشوا به أهل الطيب وأهل الحشيمه
عثمان الرشيد - الرياض
ما حلا البداوه وقتها تطرب البال
صورة بعيرينٍ وبالجنب حمّال
سوقٍ قديم يزوره أطفال ورجال
مجهزٍ ما فيه نقصٍ ولا همال
سعود عائش الحربي - القاهرة
موروث سوق مشيدينه من الطين
شح الموارد بيّنت حاجة الناس
الاقط والسمنة تجيبه بعارين
وياخذ بداله هيل والبر باكياس
كلش مجمّع في محيط الدكاكين
تمر الحسا والبُن وقماش ولباس
سعود عبدالعزيز الهزاع - نعام
عدنا وعاد تراثنا كل عامي
ومن شاهده يرتاح يلقى السعاده
فيها رجالٍ باذلين اهتمامي
ومن زارها شفنا كثير الإشاده
بجهود ربعٍ طيبين المقامي
هم طوروها تعحبك بالزياده
ريان محمد الخنيفر - الرياض
صورة العدد السابق