محشوم ياشعري عن الظلم والزور اشطح ولكن في حدود الامانه لوحدك الجاهل ترى منت معذور خلك عن الزلات عندك حصانه امشي على وضح النقا واعشق النور ولاسج رجلي في دروب الخيانه ادري بانه يلحق ابن ادم قصور ولاحدٍ كمل يا كود من جل شانه لكن على ماقيل لوكنت مجبور خل العمى يبصر ويسمع بذانه خله تجي صدمة شعارات وشعور ويقولها التاريخ باصدق بيانه والا القصايد دربها كان محضور ياكثر نكبات الفتى من لسانه سطر تخاريفه بالاوراق مكسور وعلى المنابر عاش شاعر زمانه عالم غريب مسيّره ألف دستور والرابح اللي فيه خاسر رهانه حطولهم وزن وعبارات وبحور في عصرهم كلن شهر عن سنانه ناسٍ بلا قاضي ولا تقبل الشور والنقد يعني من شروط الاهانه تاريخ لوانه محقق ومخبور حطولهم بالكذب ارقى مكانه يوم الحياة احزاب وايامها جور ماحصلوا في ذيك الايام خانه واليوم عوّد تايه الراي مقهور يجلب مهازيله ويذبح سمانه من عقب فات الدور بسنين وعصور غنى على الماضي بجرة كمانه ياهيه وينك يوم ذاكر ومذكور مالك ببحر اهل المواقيف دانه لوكان لك صيت ومكانه ومشهور شهرة ابو فرّاس وابو سفانه في وقت يكشف كل خافي ومستور وراع الكيان نقّدره من كيانه وان كان طاب الصوت هيجنت مسرور مادام ماتت بالعقول الرزانه قلبٍ خضر والعاشق انسان مامور ياخذ من احزانه ويعطي حنانه والعمر يمضي والمقادير بالدور نفسٍ خذت حقه ونفسٍ مدانه واللي رجا الجنه يبي يرجي الحور واللي طغى يلقى التعب والمهانه احدٍ غدا للهم والحزن ماسور واحدٍ طلب ربه خفى واستعانه وبين البشر تبقى علاقات وجسور مادام ماشاب العلاقه لعانه والطيب مابين المخاليق مشكور لو جار وقتك واستحال امتحانه والعمر ليته شعر واعجاب جمهور مار البلا قبر وممات وديانه لاصرت في قبرٍ به العبد محشور ماينفعك فعل الذكا والشطانه احدٍ خسر واحدٍ على الذنب مغفور والرابح اللي عز دينه وصانه والا القصايد لو تخليك مشهور ما تنفعك قدام من جل شانه
