بيت وصدى

الأسبوع الماضي كان بيت الأسبوع للشاعر عساف بن عايض العتيبي من الرياض حول مقترح الأخ عبدالله الزبن من الرياض لموضوع بيت الاسبوع وهو عدم مضايقة المعتمرين بالمكوث في الحرم المكي خاصة مع الاعمال الانشائية للتوسعة الجديدة والذي يقول:
يالمعتمر عمرتك خذها وعجلها
ولغيرك اعط المجال ومثلك الواعي
وكان صدى هذا البيت من الشعراء:
لاتزاحم الناس وان قدرت تجلها
تراه الافضل وخير الناس من طاعي
الين ربك بعد فتره يسهلها
وتصير كل الدروب افجاج ووساعي
والنيه النيه احذر لاتبدلها
والله يعز الوطن ويقوي الراعي
احمد بن ناصر المحرج/الرياض
هذي ليالي ترا ربي مفضلها
ويزيد فيها الاجر للطايف الساعي
ويا معتمر عمرتك بالرفق كملها
لا تزحم الناس مال لجلستك داعي
وان كان تقدر بعد هالعام تجلها
تجاوب مع الندا مرئي ومنذاعي
ماجد خالد العضياني - بريدة
ياباغي الاجر من عمرة تعجلها
الله فتح للاجر ابواب(ن) وساعي
ادفع مصاريفها لمحتاج وابذلها
تراه اعظم أجر من طايف ساعي
وسع لغيرك وبالمستقبل افعلها
ماحدك الله على زحمة واوجاعي
عبدالعزيز الصالح - حائل
بعض العرب له طبيعه مايبدلها
في كل شهر تشوفه طايف و ساعي
عمره وعمره وحجه ماياجلها
وذي زياره عليها القلب ملتاعي
يضايق الناس والاثام حصلها
وماينتبه لو تكرر مالها داعي
حمد عبدالله الوايلي - حوطة سدير
ياللي اتفكر بعمره ليت تاجلها
من شان ماتضايق اللي طاف وساعي
ذي توسعه للجميع اصبر انكملها
من يسمع الشور منا يعتبر واعي
هذي نصيحه علي ماقيل نرسلها
اقول مال التزاحم يابشر داعي
سعد صنهات السهلي - الدرعية
ساعد هل الخير وحذرى لا تعطلها
أخذت عمرة ما بين طايف وساعي
هذي رسالة من هو اليوم يقبلها
ومثلك كثير وصر للعلم مطواعي
هذي علومنلخلق الله نوصلها
وما يفهم العلم إلا حسن الاطباعي
محمد عبد العزيز الخنيفر - أشيقر
والاحسن انك بهذا الظرف تجلها
ان كان تقدر تاجل مالها داعي
هذي رساله لكل الناس نرسلها
كل القنوات توصل كل الاسماعي
نصبر الين المقاول له يكملها
التوسعه خير الله يوفق الراعي
علي رشيد الرشيد - رياض الخبراء
يالمعتمر خذ من الشاعر وسجلها
نصيحتن تنفعك ياليتك تراعي
لاتدحم الناس في مكه وتشغلها
مكوثك أكبر خطأ ماشوف له داعي
وقبل تودع ، بلادك دوم ادعلها
وادع لمنهو بعد للتوسعة ساعي
حمود محمد الحميداني - عنيزة
ياللي نوى العمرة اضبطها وكملها
لاتزاحم الناس لا لا مالها داعي
خلك نبيه واحذر من جواهلها
افتح مجالك الغيرك وارحم الساعي
نصيحتك يالعتيبي لزم نفعلها
هذا كلام يقوله شاعر واعي
إبراهيم البليهي - الشماسية
بيت الاسبوع:
تجاوبا مع مقترح الاخ الدكتور صالح محيسن الشمري من الرياض لموضوع بيت الاسبوع وهو وجوب الاقتصاد في استهلاك المياه وعدم الاسراف في غسيل الافنية والاحواش ارسل للصفحة الشاعر زيد بن عجرم الرشيدي من حائل هذا البيت:
ياخواننا الاسراف بالماء جريمه
بالدين وبحق الوطن واقتصاده
نستقبل صدى هذا البيت بثلاثة أبيات فقط تدور حول هذا الموضوع
ويفضل الإرسال عبر الإيميل:
rb-khozama@alriyadh.com
او على الفاكس (4871070/ 011)
مقترح لموضوع بيت الأسبوع المقبل:
ارسل للصفحة الاخ فخري حمد الحربي من الرياض مقترحا لموضوع بيت الاسبوع القادم وهو ضرورة ابعاد مواد التنظيف والمواد الخطرة عن متناول الاطفال للسلامة.