بيت وصدى

الأسبوع الماضي كان بيت الاسبوع من طرح الشاعر مبارك بن فراج السبيعي من رماح والبيت يدور حول موضوع عدم كفاية القرض العقاري لبناء بيت، والبيت يقول:
قرض العقار اليوم ما يبني البيت
يمكن ولا حتى الحديد بيجيبه
وكان الصدى من الشعراء:
القرض أضحى يالسبيعي تشاتيت
كل يبي مطلبه حالة عجيبة
واللي يعمر قال اناويش سويت
الأرض وألا القرض عاش بمصيبه
طارق سليمان السويح - البكيرية
سعر الحديد اليوم مافيه تثبيت
والناس من شدة غلاه تحكيبه
يالتاجر اللي لأكثر الخلق ضريت
محدن قدر يبني وشاف الغليبه
عبدالله بن نايف العتيبي - محفاظ المجمعة
قدمت قبل سنين واليوم مليت
قرض العقار اليوم أصبح مصيبة
القرض زاهد والغلا صار له صيت
صيت مع العربان دوم تحكيبه
محمد عفار المطيري - عنيزة
المقترض كنه على كف عفريت
قرضه مصيبه والغلا ذا مصيبة
القرض عاجز ماخذه قال ياليت
قرض العقار إزيد حالي صعيبة
بسام بن علي اليافعي - الرياض
من قبل عشر سنين ياما تحريت
اسمي مع رقمي بشير يجيبه
تكفون زيدوا القرض ياللي لهم صيت
فالسوق مثل النار ولع لهيبه
علي بن معاضه - الرياض
ليته يزاد القرض للضعف ياليت
زود السعر قرض الثلاث يغد يبه
كم واحد قال إبتديت وتهقويت
وكملتها بالدين هم وغليبه
فهد بن عقيل الطويان - بريدة
ياوجودي وجد من شاب وقرضه ماكفاه
شاب راسه ولعوارض بدا فيهن شيب
فني حاله والبناء عظم ما كفاه ماه
وكثرت العذال في القرض منزوع النصيب
مفلح الحميدي الجهمي السبيعي - بيشة
حتى العقار اليوم منه تبريت
لاصار حتى القرض أصبح نهيبة
القرض ياقله والاسعار كبريت
والرزق ياسبيعي عسى الله يجيبه
بندر العنزي
جاني ثلاثمية من البنك وأزريت
ومصيبتي ياكبرها من مصيبة
يالله بفزعة والدي طيب الصيت
عبدالله اللي كلنا نعتزيبه
محمد عبيد الديحاني - القصيم
نويت أبا اجمع هالتكاليف وازريت
وشي هالغلا تكفون منهو طبيبة
ليته يزاد القرض ياليت ياليت
مع هالغلاها لقرض ما ينغزي به
عبدالعزيز بن عبدالله البواردي
الوضع متغير عن أيام مضيت
أمنول بالقرض كلش نجيبه
واليوم لا والله ما يبني البيت
القرض ما يكفي ولا ينبني به
سعود بن سعد الحافي - الرياض
ياللي مضى لقروض الاسكان حطيت
أرقام للبنيان كانت قريبة
اليوم أعيد الدرس فيما تبنيت
في ظل أسعار العمار الصعيبة
سعود عائش التميمي الحربي - القاهرة
طن الحديد بفارق السعر عديت
ثلاثة أضعاف من قبل ينشري به
القرض ثابت والغلا منه عانيت
وباب العمارة رادمه من المصيبة
سعود بن عبدالعزيز الهزاع - نعام
بيت الاسبوع
تجاوباً مع مقترح الأخ فواز صالح السالم من حائل حول موضوع انقطاع طيران الخطوط السعودية عن بعض مدن مناطق المملكة رغم الحاجة لها أرسل لنا الشاعر ثويني العطا هذا البيت:
توه تبين لنا يااخوان
فضل الخطوط السعودية
نستقبل صدى البيت بثلاثة أبيات فقط حول موضوع البيت وتناقش قضيته على الفاكس 4871070او البريد الالكتروني:
khozama@alriyadh.com
قضية مقترحة لبيت الاسبوع القادم أرسل للصفحة الأخ فهد السعود من الرياض موضوعاً لبيت الاسبوع القادم وهو شراء شهادات الدكتوراة دون التعب في تحصيلها ودراستها.