اللغز

كان كاتب لغز الاسبوع الماضي الشاعر مطلق علي صفوق الشملاني ويقول:
ويش سفن في جزيره خمسه راسيات
الجزيره تمتلي لو يجي طشة بحر
الجزيره تشال والسفن فيها ثابتات
لو وزنته يطلع الوزن يالفاهم صفر
وقد توصل للحل شعرا:
لك سلامي والتحية تراهن جاهزات
لغز مطلق لاقريته على ضرب الوتر
حل لغزك بالدراهم رموز بينات
شفتها في خمسة راسية وسط البحر
علي الرشيد - رياض الخبراء
لغزك يابن وايل كثير الملفات
وابو رشيد ليا رمع جاب الخبر
ومن الأدبيات شرح المرفقات
(فئة خمس ريال) يالله المطر
عبدالكريم الراشد التميمي - الغزالة
مرحبا يا حي مطلق علومك وافيات
أبشر بلغزك نحلّه عسى حلي يسر
العدد وسط الدراهم تراها واضحات
والجزيرة خمسة أريل مع كل البشر
صلاح بن عبدالله اليابس - رحيمة
لغز واضح ياولد ثابت كل الثبات
لا كتبته بالورق والسطر فوق السطر
خمسة هي حلنا له اخو له خوات
والسفينه يا عرب ما يغرقها بحر
فالح غازي الحربي - رياض الخبراء
لغز الاسبوع
كتبه للصفحة الشاعر جمعان بن حشر بن قويد من وادي الدواسر
ويش الفتاة اللي على جنب رجال
تستر عليه وبعض الاوقات تنحاش
والرجل في ممشاه شيال الاثقال
والبنت ماتنفع ولاهيب تعتاش
نستقبل الحلول عبر الايميل rb-khozama@alriyadh.com او الفاكس 014871070
كما نرحب بطرح الألغاز الجيدة.
تنويه
نظراً لازدواجية المشاركات في زاويتي (صوت الصورة واللغز) نعتذر عن نشر الأسماء المتكرره في الزاويتين