تنقلوا بين المشاعر ملبين

حجاج بيت الله ثلاثة ملايين
تجمعهم الوحدة على دين الاسلام
لاطهر بقاع الأرض وصلوا محرمين
من كل فج وفج من غرب وشام
وتنقلوا بين المشاعر ملبين
بيسر وسهوله ماشكو ضيق وزحام
بكل انسيابية ودقه وتمكين
تمشي مراكبهم بتخطيط واحكام
بين المشاعر بالأمن مطمئنين
متفرغين لذكر خلاق الانام
بوسط المشاعر بالنعيم متهنين
بخدمات مايحصى عددها بالارقام
إن لدوا النظره من يسار ويمين
شافوا صروح انجاز تشمخ بالآكام
عاشو حقيقة مجد ماهيب تلوين
حقايق انجازات ماهيب أوهام
وانهوا مناسكهم وراحواعزيزين
وماعندنا لضيوفنا غير الاكرام
والفضل لله خالق الناس من طين
ثم للملوك اللي بهم حظنا قام
ملوك لهم صيت بكل الدواوين
ملوك مشاويس أمينين وحشام
حكامنا اهل الفعول الميامين
حكامنا الوافين من نسل الامام
للدين واهل الدين نعم المحبين
ولبيوت رب الكون والدين خدام
للشعب أزكى من عبير الرياحين
والطف وأنقى من ذعاذيع الانسام
ومثل الخناجر في نحور المعادين
والكل منهم بالمهمات ضرغام
ملوك لهم هومات مثل الشياهين
وتاريخهم يشهد من آلاف الاعوام
ملوك لهيبتهم تخر السلاطين
ملوك لهم مجد تسطره الاقلام
نحبهم في عسر الايام واللين
وتكبر محبتهم على مر الايام
وبعدلهم والشاهد الله راضين
ولا نستمع فيهم لحاسد ولوام
من مثل عبدالله كريم الكريمين
اللي لنا حقق عسيرات الاحلام
من مثل عبدالله مقيم الموازين
بالقول عزام وبالفعل جزام
ومن مثل سلمان الوفا قرة العين
اللي لنا في هيبته درع وحسام
لا تسألوني وش عطى اول وهالحين
يكفيه مجد انه تكفل بالايتام
ومن مثل احمد في سجل الوفيين
وان قيل أحمد قلت للأمن صمصام
له منجزات ماتبي زود تبيين
يسهر بحفظ الامن والناس نيام
وياغلى وطن في زين الاوقات الشين
حنا بنحور اللي يعادونك سهام
ازهم وتلقانا بساحتك عجلين
نرخص لك الارواح وندوس الالغام
علمك خفاق بكل الميادين
مانكسوه بيوم تنكيس الاعلام
يااغلى وطن تبقى حبيب الملايين
في ظل حكام عزيزين وكرام
عطاالله بن سليمان العطاالله