سلّم لنا يارب قايد بلدنا

يالله يا والي علينا ومعبود
يامحصي هالخلق الاقصى والادنا
يالله يا منان يا خير مقصود
ياللي ركعنا لك خضوع وسجدنا
جيناك يارب السما وفود ووفود
يالله لا تضيع ياربي جهدنا
جيناك يوم الناس هجاع ورقود
ناخت مطايانا وعليك اعتمدنا
بابك عن المضطر ما هوب مردود
ياواحد ماغير جاهه قصدنا
الحيل يا رحمن واني ومهدود
وبك يا إله الكون لذنا وهدنا
يافرد يا معبود يا منتهي الجود
سلم لنا يا رب قايد بلدنا
اشف الفهد عز الوطن وابرد كبود
اشف الفهد يارب وارحم جلدنا
شيخ الشيوخ اللي له العهد معقود
اللي بوجوده كل خير وردنا
نبي يا ربي نارد بقضلك عدود
ونقول طاب الشيخ للي نشدنا
ونبي يا ربي عافيتك ونبي زود
تلبس بها فهد العروبه فهدنا
دام انت فينا ياذرا العز موجود
فانا بخير ومذهب الله نكدنا
حبل الرخا والعز والخير ممدود
لاصرت فينا طيب ياعمدنا
البنت والرجال والطفل والعود
كل دعالك بالشفا ياسعدنا
والله عليك نخاف من هبة النود
وارواحنا تفديك واغلى ولدنا
وترى الوطن لاطبت ماعنه منشود
دام انت واخوانك ذرانا وسندنا
قصر الشموخ بهمتك صار مشيود
وبيديك صافحنا المعالي بيدنا
عليك كل سعودي اليوم محسود
أحد غبطان فيك واحد حسدنا
لا طبت طاب الوقت والناس والذود
ويالله يالمولى من الخير زدنا
لا طبت طاب اليوم شاهد ومشهود
وحنا شهود العصر لامن شهدنا
لاطبت طابت نجد وبلاد الاخدود
وشمال نجد وشرقها وان بعدنا
وعسير وتهامه مع اجبالها السود
وارض الحجاز اللي جسدها جسدنا
وطابت بلاد مالها حد وحدود
وناس تعدوا في عددهم عددنا
لاطبت طاب المجد والعز والجود
واستبشرت بالخير واحة بلدنا