عواكيس

* السيد معوكس صباح العسل والقشطة طلب مني احد أصدقائي افضل خمسة لاعبين مروا على الكرة السعودية، قلت ماجدونا والثنيان وسعيد مذكور الغامدي (الغراب) والنعيمة، واحترت بالأخير تكفا ساعدني من يكون؟
عبدالله العبيوي أبو نايف عاشق حي المصيف (الكويت)
- ما فيه غيره أبو الأكواع والإيقافات
* الأستاذ معوكس أحلى تحية بصراحة وش رأيك في مستوى فريق الهلال في كأس الأمير فيصل هذا الموسم الأمور لحد الآن تمام وعلى ما يرام وإلى متى يجامل حسن العتيبي على حساب المتألق شراحيلي كافيه مجامله متى يتعلم من أخطائه بعد الاعتزال للأسف صار نقطة ضعف واضحة في الهلال.
أبو تركي الرياض
- ولو ابو علي حارس لا يمكن ان تتنبأ بما يفعل مرة ينجم ومباراة يخور الزعفراني.
* الأخ المحترم معوكس: من تتوقع يذبح الحواشي بصراحة لو فاز الاتحاد؟ وبعدين ليش الهلال دائم ينهار في الشوط الثاني ثم وش رأيك في نطحة هزازي؟
صديقك معاذ الحميد - مرات
- هزازي نسي نفسه ويحسب انه زيدان.. والهلال علمه عند دول والجابر
* الأخ العزيز معوكس ما شفناك على التويتر وبعدين أخي ليش ما ترفع نسبة التواصل معاك.. ترى كلها اتفاق مع بعض المكاتب وتطلع الاول في نسبة التواصل ويعني انك مهم وان الناس تجري وراك.. ترى كم اعلامي ومذيع سواها قبلك؟
فهد الخريصي- حفر الباطن
- بعض الناس انشغلوا بتويتر ونسوا شغلهم.. ولو دخلت تويتر ما راح ينافسني إلا منافسي صياد وأنا الأول وهو الثاني وبنفوز بكل الاستفتاءات حتى اللي في المغرب وشمال افريقيا.
* أسألك يا فيتامين الصحافة وفاكهتها لمن يريد الرأي الواقعي المقنع مستوى أسامه المولد هل يستحق الاحتراف الخارجي؟
عبدالله سعود السعد- محافظه ثادق
- يستحق ولا ينسى ياخذ معه اسامة هوساوي بعد وبكرة يرجعون لنا وهم يرطنون لغات.
* عزيزي معوكس لن ينصلح حال النصر إلا بتكاتف أعضاء الشرف؟
اخوك المشجع النصراوي لافي صالح العنزي
- يا قدم ها الاسطوانة.. المهم الرئيس القادم بدأ يحضر أوراقه.
* أخ معوكس: هل أنت مقتنع من طرد نايف هزازي في مباراة الاتحاد في كوريا؟!
سفير الحلة - الخبراء
- مقتنع بالحيل.. وليتهم وقفوه مثل ما وقفوا الجمعان قدام ايران.
* يا ابو العواكيس في عصرية الخميس كنت اسولف مع خالي الونيس وشفت على أحد الفضائيات صديقك صياد وتوقعت أشوفك بس خسارة مافيش؟
بدر اليعقوب - القيصومة
- طبعا لا يمكن أن نطلع انا وإياه، لكن الوعد السنة الجاية ابرابط على ابواب الفضائيات وهات لقاءات وتصريحات.
* استاذ معوكس هل كنا بحاجة الى ان يضع المنتخب السعودي في (زنقة) حتى يعلق مصيرنا بالجولة الاخيرة؟
خالد العنزي - عرعر
- قلنا لهم لا تفرحون ترى مستوى تايلند ما عندك أحد بس ما صدقتونا وياليت الله فكنا من دبلها دبلها
* استاذ معوكس هالحين وشلونا إدارة التخطيط الإعلامي تسوي حملة لتشجيع المنتخب أمام تايلاند وبعدين كنسلتها ثم ياعزيزي الا تلاحظ ان بعض اعضاء الحملة هم من كان يسيء الى منتخب الوطن ونجومه؟
سعد الخمعلي- تبوك
- هالادارة من كبر اسمها ما عاد باقي إلا يسمونها إدارة مسرح العمليات!!
* الا تتفق معي يامعوكس ان ابعاد حمزة وحسن خليفة غير مدروس؟
احمد الغامدي - جدة
- إلا مدروس بس ليلي.
* ليش يابو العواكيس انتقد ماجد عبدالله تدبيل المكافأة يعني ينسى يومه لاعب وشلون يعلنون التدبيل وساكت؟
عبدالله المري - شروره
- ابو عبدالله يا سرع ما ينسى!
* هالحين كيف يامعوكس يتهم عادل عصام الدين المعلق عبدالله الحربي بقطع الصوت امام تايلاند ويطلع مساعده غانم القحطاني ويبري ساحة المعلق من نصدق؟
جاسم الظفيري - الدمام
- خلاص الموضوع أمام لجنة الانضباط والفنية والمسابقات حتى نعرف الخبر اليقين.
* العزيز معوكس متى نراك إداري فريق يلف على جميع الفضائيات بعد نهاية مباريات فريقه.. والا ما عندك ثقافة تصريح؟
تركي الراشد - بريدة
- أخاف من الإيقافات والانبراشات.
• عزيزي معوكس.. طولت الغيبة من شهرين ما طلعت علينا عسى ما شر والا تراك مصيف من بدري بس ياليت ندري؟
صديقك الدائم حمد الدوسري
- العزيزية - الرياض
- الموضوع وما فيه احترفت في احد الصحف الصينية وفشلت التجربة ورجعنا لكم.