الدار طابت يوم حلّت بها خطاك

الشعر يبتهج فرحاً بعودة خادم الحرمين إلى أرض الوطن

هب القصيد وعانق الشعر الافلاك
ونوّخت في قفر المعاني ذلوله
والدار طابت يوم حلّت بها خطاك
والفكر يسرج للفرايد خيوله
وتزيّنت نجد العذيه لقياك
يامن تشرفنا بلحظة وصوله
سلامتك ورواحنا كلها فداك
طهور ودعانا تحقق قبوله
يالعادل الباني على الحق مرماك
تحكم بشرع الله وسنة رسوله
يا ابو اليتامى والارامل وفكاك
من كبّله وقته وعازت حلوله
الشعب كلٍ له توجّه ومسلاك
لاشك في حبك توحّد ميوله
بأرض الوطن ياسيد الشعب حياك
قلوبنا قبل ألسنتنا تقوله
يابن الامام اللي على الطيب رباك
ووريث من عقبان نجد خضعوله
عبدالعزيز اللي ثنى دون الاملاك
بالسيف ماجت له بيسر وسهوله
وحّد شوارد نجد في حزم وادراك
وخلى لنا عز ومهابه ودوله
واليوم في عهدك وظلك وحسناك
امن وامان ومجدنا من يطوله
كم خايفٍ يا دارنا عاش بحماك
ومن يستظل طويق محدٍ ينوله
اللي يبيك بخير يبشر اليا جاك
واللي يبيك بشر يده مغلوله
حنا جنودك ياوطنا ونفداك
بالروح واللي نملكه والحموله
واليوم في عهد الرخا طاب مسعاك
قلته يابو متعب وغيري يقوله
ياسيدي من يوم فازت بلاماك
والدار ماهي في غلاك معذوله
لبستها ثوب التطور بيمناك
والعز هبّت في وجودك فلوله
تحكم بشرع الله وبالحق مبداك
وبيديك صعبات الامور محلوله
انت الكريم اللي جزالٍ عطاياك
يا ناصر اللي متعباته حموله
دايم بفعل الخير تمشي مطاياك
ولك في دروب المجد صوله وجوله
والمعذره ياسيدي لا عدمناك
يا الفيصلي ساس الشرف والبطوله
صاب الشعر من هيبتك حالة ارباك
وكل القصايد عند طيبك خجوله
ياسيدي والشعر لا قيل يزهاك
تجي حروفه يم وصفك عجوله
قلت اكتبه وارفع مقامه بطرياك
ولا انت فوق اللي نعد ونقوله
نهار ممدوح