النادر الباتع عطيب المضاريب ... الفيصلي راع الكفوف الندية

حين يكون الشعر في مقام سيدي صاحب السمو الملكي الأمير نايف بن عبدالعزيز النائب الثاني ووزير الداخلية - أطال الله عمره وأدام عزه - فإن كل نصوص الشعر الجزل في مقام سموه الكريم هي بعض توثيق ما يكنه الجميع لمواقف سموه الكريم الكبيرة العامة والخاصة حفظه الله.
المدح يزهى سيدي نايف الطيب
تجيه عسرات القوافي هديه
وادري لو اني ما اعلم السر والغيب
انه فلا يوجد بجيله حليه
النادر الباتع عطيب المضاريب
الفيصلي راع الكفوف النديه
حرٍّ مطاليعه بروس المراقيب
وله في دروب المجد روحه وجيه
ابن الامام اللي حكمها على النيب
بالسيف ما جت له بلاش وعطيه
رسّى قواعدها بحكمه وترتيب
لين اصبحت نجد العذيّه عذيّه
واليوم نشرب من قراح المشاريب
أمن وأمان ولحمةٍ داخليه
الشعب واحد والوفا للمعازيب
موجود من فضل الولي بالرعيه
ما نلتفت لمعوّجين الاساليب
المارقين أهل العلوم الرديه
يا مدعين الحق وانتم مجانيب
عن سكة أهل الدين وأهل الحميه
والحق واضح دون شكٍ ولا ريب
ما يجهله عاقل ونفسه خليّه
مير البلا في روسكم يوجد العيب
بأفكاركم سمٍّ مهو سم حيه
أفكاركم قتل وخيانه وترهيب
وازهاق لرواح النفوس البريه
لكن بعون الله واقوله ولا نيب
خايف وشمس الحق ليه جليه
ما تفرحون بتايهات المطاليب
والدار بعزوم الرجال محميه
حنا ذراها عن سموم اللواهيب
من دونها نارد حياض المنيه
بالجو طياره وبالقاع تدريب
والدين واحد والعقيده قويه
ياسيدي حنا رجال المواجيب
حنا حماة الدار من كل سيه
واختامها مني سلامٍ وترحيب
في سيدي نايف زبون الونيه
شعر- نهار بن ممدوح