تمنيتك.. حياتي كلها.. عايش وانا اتمناك مناي.. القى صفاتك.. في اللي ان جيته يهلي بي غلاك بخاطري شي تعدى الوصف.. يا.. ما اغلاك حياتي كلها.. ما عشت مثله في تجاريبي رعاك الله.. يا زهرة حياتي.. وانبتك واسقاك قبل لقياك.. ما ذقت الحياة اللي تسوي بي يا ليتك ترحم اللي.. قضبك يمناه في يمناك معك للي تبي.. ما قال يوم.. وين تمشي بي دريت.. او ما دريت انه.. هواه وغايته يلقاك لو انه يبي غيرك.. كان.. يا كثر المعازيبي انا ابغاك انت.. ما ابغى عنك لا ذولا.. ولا ذولاك انا واياك.. من دون الاصاحب والاجانيبي ليا مني ذكرتك يا بعد.. من همهم ذكراك دريت ان الحياة بدون.. اشباح وسراديبي متى ابلقاك راضي.. يا جعل من زعلك يفداك يعلك تسمع ظروفي.. وتسمح في مطاليبي قضيت العمر.. اتمنى اسمعك واطالع محياك رجاي ومنيتي قربك وشوفك.. وانت تدري بي حرام انك تفارقني.. وانا ما اقدر على فرقاك غيابك عن عيوني.. كافي لهمي وتعذيبي ملكت بلطفك القلب العنيد.. وسار خلف خطاك ترفق به.. تراه ضعيف.. لو قالوا لك.. صعيبي عبدالعزيز الحريقي
