تباشروا به يوم جا راع الوفاء

يا مرحبا بشيخ على العارض لفى
بقدوم سلطان أنورت وديانها
تباشروا به يوم جاء راع الوفا
الخيل تلعب له وتوم أرسانها
ابحاكم خيره على الديره ظفى
يومه لفاها سورها سلطانها
وله أطلق المسجون عن سجنه عفا
وفرحت عجايزها معا شيبانها
كل تباشر به على بين وخفى
وقارت طميه بشرت ضلعانها
وطويق معه النير صفق واحتفى
وجبال حايل جت على دندانها
يا سيدي كل فرح لك بالشفا
حتى الحمامة غردت بألحانها
والحر الأشقر يوم بشر فاكتفى
خلى الحباري واقف وزانها
ونهني العاهل بفرحات الشفا
نهني أبو متعب ملكها حصانها
ونايف وزير الدار في برد ودفا
زيزومها لامن صفق دخانها
بقدومكم يا سيدي كلش صفا
ومرافقك سلمان نال احسانها
الحاكم اللي عن عضيده ما غفى
حلياه من صقر الجزيرة نالها
له العلم رفرف مع يدين عرفا
وأهل المشاعر عبرت قيفانها
يا سيدي دولتك تعطيك الوفا
في كل ما تحتاج شانك شانها
يا ملوكنا بالطيب فالدوله كفا
كلن شهد فيها.. قرا عنوانها
ملوك تجي بالوجه ما هو بالقفا
صانو رعيتهم وربي صانها
عيال عود فالمصاعب ماهفا
منه الركايب بركت بثفانها
من السيف جاها رافع سيف النفا
من فوق شقراً خضبت ميدانها
انتو غطانا عن سموم وعن سفا
مثل العيون اللي غطاها أجفانها
كل شكى من دولته جوع وجفا
وملوكنا تضفي علينا أردانها
وصلاة ربي للنبي المصطفى
لمحمد اللي خاتم قرانها
وضحى بنت عبدالله السهلي