الطغمة اللي شين الله فالها

بسم الله الرحمن ربي قلتها في كل حال
رب العباد اللي يعرف امورها واحوالها
الله ولا غير الله الوالي عليه الاتكال
سبحانك اللهم عد ايامها وليالها
ثم بعدها جالي على بدع الطواريق المجال
من يوم شفت الطغمة اللي شين الله فالها
الطغمة اللي فعلها ماهوب من فعل الرجال
شرذمة قبيحة مقبوحة بفعالها
اللي تبونه ياخفافيش الظلام اصلاً محال
والناس بفعال البشر تحكم ماهو بشكالها
خذيتم الارهاب سنة ياذميمين الخصال
تذبحون العالم اللي عايشه في حالها
وتروّعون الآمنين المهتنين بزين فال
وتهدّمون بيوتها وتصادرون اموالها
شمتم العالم علينا يا خبيثين العمال
وخالفتم القرآن والسنة وكل افضالها
ان كنت مسلم يا عدو الدين عندي لك سؤال
وش استفاد الدين منك وشلتك واعمالها
ما تدري انك عايش في مهمهية الانعزال
مالك مكان ولا وجود وحالتك يرثالها
ماتدري ان عقلك هبيل وعايش وسط الهبال
شروك عدوان الوطن مثل الغنم بريالها
كبش الفدى لاهل الردى روحه ولا تسوى ريال
ويحي عن اللي خالط السلة وجايبرالها
عزى لربعه كلبوهم من عمام ومن خوا ل
ربوعه اللي مالها بقرب المشاكل مالها
لكن حنا من عوايدنا على طول الليال
انثبت الحجة ونقلبها على اللي قالها
ان عودت يم الوطن فلا نقاش ولا جدال
تخسى ثعالبة الظلام اللي ترز اذيالها
حب الوطن بقلوبنا يرسي كما ترسي الجبال
والشلة اللي خربت والله ما هوب اشوالها
حب الوطن بقلوبنا ثابت ولا يمكن يزال
ما ينمحي طول السنين اللي يهل هلالها
حنا ترانا نعتلي روس الشماريخ الطوال
ماهمنا ذيك الوجيه الكابية وحثالها
حنا وطنا ما نبيعه بالحرام وبالحلال
لا يفرح اعداء الوطن مرة ولا يحلالها
تعال يا حرف القصايد والشعر قرّب تعال
ماتعرف ظهور المهار الا رجل خيالها
اكتب حروف البيت هذا بالذهب وسط الرمال
ثم انقشه في سهلها وهضابها وجبالها
الله يديم الدولة اللي حكمها حكم عدال
والله يعز الشجرة اللي نستظل اظلالها
بدر محمد زبار السبيعي