فلاش

اتصل علي يوم السبت اللي فات.. وبارك لي بالعشر الأواخر من شهر رمضان.. وقال.. أنا توقفت عن شرب الكحول وتعاطي المخدرات.. أنا أول ما بديت التعاطي بالشراب ثم الحبوب أبو ملف ثم أدمنت على الحشيش.. وتذكر وقال.. لكن أشوى ما تعاطيت الهيروين.. أنا أزعجت أهلي وأمي وأخواني وسويت لهم مشاكل كثيرة حتى صرت بيّاع.. وفيه موقف ما راح أنساه.. يوم درت أمي إني أبيع المخدرات ..سكت وجلس يصيح.. ويقول أمي ماتت الله يرحمها.. لقت سبعة كيلو حشيش في شنطتي ضربتني بلي كان معها.. قلتلها خليني أفصخ ثوبي واضربيني إلين تقولين بس و تطلعين الدم من جسمي عشان أحس بالضرب.. وقال.. تدري وشقالت لي.. قالت.. أنت ولدي أنت حبيبي.. ما أقدر أضربك وضمتني وقالت إترك المخدرات عنك.. هذي البلوى.. قلت كم عمرك قال.. أنا عمري أربعين لكن لو تشوفني تعطيني سبعين أنا مريض ألحين كلها من المخدرات أنا فيني القلب والسكر وجاتني جلطتين وأمشي على عكاّز.. وكمّل وقال.. أهم شي إني ألحين أقدر أصلي وأذكر الله.. والله يتوب علي.. لا قوة إلا بالله ما فيه أكثر من العبرة هذي.. ويالله سترك.
الأبرق