موروثنا باقي على مرّ الازمان ما فيه بيتٍ ما يجي فيه دلّه

صفٍ جديد برف مِنْ صنع رسلان
مستعمله بيدين تعمل لها ربَّاب
وياما حلا فنجال منهن مْسيان
في مجلسٍ لا طاقةٍ فيه او باب
حِنَّا بجوٍ يِسعد القلب واعيان
في دِيرةٍ الكل في وسطها احباب
ويالله يامن يطلبه كل إنسان
مِنْ كل خير الموطني هَيّْ الاسباب
سعود عائش الحربي - جدة
موروثنا باقي على مرّ الازمان
ما فيه بيتٍ ما يجي فيه دلّه
وان جو لنا السّواح من كل الاوطان
لازم يشوفون الكرم في محلّه
متأصلٍ تاريخنا طيب.. واحسان
ما هوب صوره في غلاف المجلّه
سليمان بن عبدالعزيز السنيدي - الرياض
صنعه لها تاريخ من عصر الأجداد
صنع الدلال مجهزاتٍ على الكيف
متنوعه بالشكل.. والحجم أعداد
واللون صفر معتقاتٍ من الضيف
صارت تراثٍ ذكرها ماضي أمجاد
راحت مع اللي يقني الخيل والسيف
حمد عبدالله الوايلي - حوطة سدير
يا مرحبا بك والغلا ماله حدود
يا شايب الرحمن فخر السعودي
تصلح لك ادلالٍ على ورث وجدود
لنا الفخر في تراثنا اللي يزودي
خالد بن ناصر المخيمر - روضة سدير
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق