الأرض لبست حلة العشب وورود وين انت ياللي للمطاليع هاوي

كتب بيت الأسبوع الماضي الشاعر غالب ظاهر الجنيدي من رفحا والذي يقول:
الارض لبست حلة العشب وورود
وين انت ياللي للمطاليع هاوي
وكان الصدى من الشعراء أكثر من رائع:
ماعاد به وسط البلد نوم وقْعود
دامٍ شمال الدار عشبه رهاوي
نبي نمتّع ناظر وحيل مهدود
من زحمة الدنيا وشوف البلاوي
مع صاحبٍ اتشوف بحجاجه الزود
نعم الرفيق ونعم من هو يخاوي
في فيضةٍ خضرا ويلعب بها النود
متخالفٍ فيها الزهر ومْتساوي
عوض سلامة العنزي - الرياض
ما دام عشب البر في البر موجود،
قبل يصير العشب في البر ذاوي.
رح اكسب الفرصة وجرّب هوا النود،
في موقعٍ تصير فيه متشاوي،
مع رفقةٍ تبري من العلة كبود،
الكل منهم شهم للخير ناوي.
يومٍ جفاف ويوم يبرض به العود،
ما هوب وضعك في الحياة مْتساوي.
محمد مقحم المقحم - الرياض
الفضل للمولى ربي هو خير معبود
علام غيب السموات وما كنت ناوي
له الثناء منا والحمد والشكر زود
الخير عم والعشب من الخير راوي
وريح النفل جد يشفي عليل الكبود
تقل ينادي للعشاق والقلب الهواوي
الوكاد راع الغنم بالفيضة ماله وجود
في وسط النفود وماله طريق متساوي
صالح البشري - القصيم
العشب راحه للنظر في الخلا زود
خص(ن) إلا صار الربيع متساوي
ومزفلت(ن) له درب والخط ممدود
واللي معك في صحبتك لك مخاوي
أمن وأمان ودربنا سهود ومهود
وترتب العزبه إلا صرت ناوي
سليمان بن عبدالعزيز السنيدي - الرياض
اكشت واستانس ولاكن له حدود
لاصرت هاوي وللمكاشيت ناوي
اختر خويك من المطاليق معدود
وجهز امورك من جميع النحاوي
الأرض خضرا مورقه مابقى عود
لاعط ريح العشب والخير ضاوي
والجو صافي والدلايل لها شهود
تعيش وقتك وانت داله سلاوي
حمد عبدالله الوايلي - حوطة سدير
هذا السنه الخير ضافي وبه زود
مافيه دارن في وطنا سناوي
الله يديم الخير ويحط به فود
وتسعد به المتمشيه والشواوي
من سج به راح العنا عنه والكود
لو كان يقضي فيه وقته خلاوي
في حاجرن ماهو من الناس مريود
نبته قفر ومن الهماليل راوي
سعود ثواب سليم المطيري - القصيم
سجْ القدم في مزهر الروض يا حمود
في صحبة الاخوان او كنت فرداوي
فالبر عِشق اسلافنا والجدود
ومشت به الركبان اًو غرد به الراوي
وحلو الطبيعه والهوى غير محدود
وعن شوف غير ذا قلبك غناوي
سعود عائش الحربي - جدة
بيت الأسبوع
كتب بيت الأسبوع الشاعر ذيب العمودي ويقول:
والله ما ادري من نعايد من الناس
ثلاثة أرباع العلاقات فاضي
نستقبل صدى البيت المطروح خلال ثلاثة أيام
من نشر البيت المطروح على إيميل الصفحة:
rb-khozama@alriyadh.com