شخصية العام وأيضاً كل عصر وجيل

أبيات في سمو سيدي الأمير/ محمد بن سلمان، حفظه الله، بمناسبة اختيارة الشخصيه الأكثر تأثيراً.
شبيه جده معزي العود فعل وزول
شوق الحُكم والوطن ومنقّضات الجديل
قيّضه ربي لنا لعل عمره يطول
(الحمل) كايد ولكن قد حمله شعيل
على بركة الولي سمّى وشال الحمول
من بعد ما أيّد طموحه كل شيخ ٍجليل
استشرَق الجاي حزم وعزم ماهو فضول
واشرق صباح الأمل من عقب ماهو بليل
عصر التخلف غرب نجمه وصابه أُفول
وعصر التطور بزغ نوره وشب الفتيل
استنهض الهمه اللي غارقه في وحول
ورز العلم وأوقد الشعله براس الطويل
وحدد هَدَفْه وكسر عزمه كبار القفول
ما قال لأحلام كل الشعب صبراً جميل
واستثمر بجيله اللي كان شبه إمعزول
وأمر بدعم المواهب كيل من فوق كيل
ورغم اكتفاء (البلد) بالنفط أوجد حلول
ونوع مصادر (دَخَلْه) وصار عنده بديل
وصحح مبادئ هل الصحوة وأنار العقول
وقضى على فكر مُتْطرف وفتنة عميل
ورفّه عن الشعب وأرضى كل من له ميول
ومدات جوده تخلي مد غيره بخيل
كتب معاً فوق هام السحب ما رضا النزول
وشطّب على مصطلح يا صعبها بالموزيل
وصعد على سلّم القوه وهوّه يقول
الضعف ما حطه الطيّب لرجله سبيل
فَحَلْ معرَّب قوي منسب سلالة فحول
المجد خله وهو للمجد صاير خليل
واذا الفكر مستطيله ذات عرض وطول
ترى محمد يفكر خارج المستطيل
تعلموا منه ياللي ودكم بالوصول
خطوة طريق النجاح اللي بداها بميل
قولو لمن هاب راسه صمخ روس الزحول
ما لَبْس تاج الفخر من كان راسه ذليل
ماحد ٍيسجل له بباب المعالي دخول
إلا بقول يؤرخ له وفعل مهيل
من شاف نهضة بلادي يا محمد يقول
من رحم قو الإراده يولد المستحيل
امسَت وهي كهلة ٍواضحَت وهيّه بتول
جدد دماها وشبّت أُم طرف ٍكحيل
حتى غدت واحة ٍتغري خَضَار وحقول
من عقب ماهي قفر جاء للقماري هديل
شبيه لطويق ثابت والبلَس والدخول
ما هوب من وين ما مال الهوى به يميل
ماضاع عنده حقوق لو حجبها سدول
يخافه الجاني ويأمن به اللي دخيل
في ساحة الكون متسيّد يصول ويجول
ولا هنا له مبيت ولا هنا له مقيل
نِحسد على سيدي لعل عمره يطول
شخصية العام وايضاً كل عصر وجيل
ويقول للي يرى ما قد فعل في ذهول
صبرك عليّ مافعلته لأجل داري قليل
وان قيل (لحظه) تريّح قال ما أقدر عجول
ودي أحقق طموحي قبل يوم الرحيل
الشاعر/ عايش بن محمد أبو ليل