هم ذخرنا

يامن قويت اضعاف كيد العصابة
يا مرسل على ابرهة طير ابابيل
طير قوي كيده بحجم الذبابه
تقبل دعاء عبد دعاك آخر الليل
متوسل بك وانت منك الاجابة
تحفظ بحفظ منك عن نقص عن ميل
الدار واهل الدار تحفظ جنابه
دار لها جينا نعزف المواويل
اليوم يوم الدار يامر حبابه
يوم على شعب الوطن غالي حيل
الشعب يفرح شايبه مع شبابه
اليوم ذكرى من عدل طافح الكيل
من يوم ما حدد نهاراً غزابه
جالك يقود القافلة مقبل الليل
ربعه وجيشه والسلاح وزهابه
هو شيخهم سبارهم بالدرابيل
هو ذيبهم مهما تكون الذيابه
عبدالعزيز اليا متطى صهوة الخيل
ما يرجع الا السيف باقي انصابه
جاهد ووحدها بجيش ورجاجيل
هاك الشجاع اللي غزاها وجابه
رغم عن اصحاب النفوس المغاليل
عهد عليه وعزوة لعتزابه
دولة ودونه ذلل الصعب تذليل
توالت الاطراف ساعة مشى به
خلا العداء ماله عليها مداخيل
اسس قواعد دولة يقتدابه
يحكم بشرع الله ولا عنه تبديل
وسنة محمد طبقه واهتدابه
حتى رحل واوصى الزحول الحلاحيل
اعياله اللي كملوا ما سعى به
يوم ان ابوهم كلل الجهد تكليل
ما ضيعوا جهده بساعة غيابه
هم ذخرنا وجه الليال المقابيل
بيت لنا نلقى السكن والذرابه
اول والاول صامل الرأس حلحيل
كل الشعوب اليوم تحسب حسابه
من خادم البيتين غيره ليا قيل
فهد فهد والا الاسامي تشابه
هو سيفنا نطح السيوف المصاقيل
هو درعنا اللي كل جسم اكتسابه
معه العضيد اينول وايطول ماطيل
الساعدالايمن لرأسه اعصابه
لاقلت ابو متعب تزين التماثيل
في مدح «عبدالله» تجود الكتابه
راع الكرام من يكرم الضيف بالحيل
ما صك بوجيه المقابيل بابه
«وسلطان سلطان» العطاء كنه السيل
الكل يفرح في نهاراً لفابه
النائب الثاني كما طلعت اسهيل
اليا طلع محد يدور غيابه
يمناه للملهوف غيث كما النيل
ينفق ما يملك ما يحسب حسابه
«آل سعود» احرار جيل على جيل
سلاحنا لا جاء نهار الحرابه
للسلم سلم وكم على العايل اتعيل
في ظلهم صرنا ربوع وقرابه
يا رب حفظ منك عن نقص عن ميل
الدار واهل الدار تحفظ جنابه
ليلان الرشيدي