إلا صفى لك زمانك عل ياضامي اشرب قبل لا يحوس الطين صافيها

كان بيت الأسبوع الماضي مجاراة لبيت الشاعر الأمير خالد الفيصل الذي يقول:
الا صفى لك زمانك عل ياضامي
اشرب قبل لا يحوس الطين صافيها
ووصل لإيميل الصفحة 41 مجاراة لهذا البيت:
منهو من ارض الحبيّب جايب اعلامي
عن غرستن راوية في وسط اراضيها
لعل يسترّ من هيّم بها هيامي
ياليتني من يراعيها ويسقيها
ابحق من طاف بيت الله ومن صامي
انه لمن والعن فيها يخليها
ياليتلي فرصتن من قبل لختامي
واحط تسعين بيتن لجل اشافيها
محمد عبدالله الشهري - جبل اثرب
والا فعلت السبب ما ظنك اتلامي
وايامك القادمة تخفي خوافيها
لو زان وقتك مع الايام ما دامي
دنيا تقلب لعل الخير قافيها
زمانك اليوم ما هو مثله العامي
كل تعجب يقول الناس وش فيها
علي الرشيد - رياض الخبراء
وقت تغير ويركض كنه احلامي
ودنياك يا صاح مجهوله خوافيها
ياما التفاكير فيها كثر الاوهامي
وترى حقوق البشر لابد توفيها
الحمد لله بخير بدار الاسلامي
وعلومنا نحمد الله ما نخفيها
محمد بن عبد العزيزالخنيفر - اشيقر
ان طعت ربك تشوف الخير متنامي
ومن ذي سلومه عسى ربي يعافيها
لايروح عمرك من عامن الى عامي
واترك سنينن مضت واللي حصل فيها
الحمد لله وحنا بدار الاسلامي
ونفسن مشت ضدنا حنا نجافيها
ريان بن محمد الخنيفر - اشيقر
ماينفع اللي توانى عض الابهامي
ولا يِحْيِيِ زْهورِ ذبلت مايِ ساقيها
دنيا البشر ماتطاوع غير مقدامي
عزام نفسٍ هدفها دوم يعليها
ماضيع أيّام عمره في رجا أوهامي
طمّاح مايندب حظوظٍ شاب ماضيها
يصبر ولو في طريقه ذاقِ آلامي
يجرع مرارةْ ظرُوفه لجل حاليها
ناصر جمعان آل عوض - وادي الدواسر
دنياك هذي مادامت مثل الأحلامي
ولانعلم ايامنا وش هي تخفيها
والحمد لله حنا بدين الاسلامي
وبسم الله الواحد أولها وتاليها
ياحي امير لمكة درع درع وحزامي
خالد وحي القوافي مع معانيها
صالح محمد محارب البشري - الرياض
الحظ لا طاب لك اوصيك بشمامي
تقطف من أحلامك أجمل ما زهى فيها
ولا ذعذعت لك رياح الغرب والشامي
خل الصدر يمتلئ بأطيب ذواريها
والغيث آمال لاكباد و ضوامي
قبل إلسَّنا مع حلول القيض يضميها
واغنم بطيب العمل في كل الايامي
ما دامت النفس في قمة عوافيها
سعود عائش الحربي- جدة
الوقت يا صاحبي لوزان لك عامي
وشربت من صافي اللذات مافيها
ثم عشت جو قديم فيه الأحلامي
ترى المشاريف تتعب من رقافيها
اكسب زمانك وخلك واحدسامي
وجنب عن اللي يعيب في تواليها
والي عملته تخطه سودالأقلامي
ويارب سترك الى بانت خوافيها
حمد عبدالله الوايلي - حوطة سدير
بيت الأسبوع
مجاراة للشاعر الكبير خلف هذال، الذي يقول:
اكحل عدوِّك لين تعمى عيونه
البس له أغلى اللبس لو كنت جايع
نستقبل صدى هذا البيت بهذه المناسبة خلال أربعة أيام من نشر البيت على إيميل الصفحة:
rb-khozama@alriyadh.com