ياضايق الصدر طبك النفس وعلاجه سجة قدم بين لينه والعويقيله

بيت الأسبوع كتبه الشاعر عبيد بن عبدالله بن رمال من الجوف ويحث المتشوقين للربيع أن يبحثوا عن فرصة للاستمتاع به هذه الأيام قائلاً:
يا ضايق الصدر طبك النفس وعلاجه
سجة قدم بين لينه والعويقيله
وجاءت مجاراة أصداء البيت:
هذي تراها علامة فلة احجاجه
والجو رايق معه اصحاب من جيله
ولا تكلم رفيقك اسمع وناجه
ولا تسمع اللي كثيرات تهاويله
واحرص على اللي طريق الخير منهاجه
يعجبك رايه وترتيبه وتحليله
علي الرشيد - رياض الخبراء
وجدي على شوفة الخلجان وافجاجه
في جرهد خالي والرجل تمشيله
والعشب كاسيه خضره زان منهاجه
عله من الوسم وسم باقي سيله
خوة نشامى تجوب الأرض دواجه
والكل منهم يبادر في مواصيله
ينساح بالك وتنسى الهرج واحراجه
هذي حياة السعد يلي على ليله
ما هوب وسط المدينه صوت وازعاجه
والرابح ألي سعيد وعايش بجيله
حمد عبدالله الوايلي - حوطة سدير
في المطبعة زاد حرف وصار لجلاجه
وأنته طبيب القوافي عذبة الشيله
يا زين مخيامنا والرجل دواجه
بفياض نجد العذية مع مساييله
وإلا لغرس رطيب يقضي الحاجه
لمحيرقة ديرتي ياسعد منهيله
سعد العريفي - محيرقة
أقولها جد ما هو هرج هراجه
ياعبيد لا فض فوك برايع الشيله
ريح النفل والغنم ما فيه دواجه
غير أم سالم تجر الصوت يا ليله
قبل صلاة الفجر والنار وهاجه
دلال ثنتين عود وواحده هيله
هي منوتي هي علاج القلب وازعاجه
يطرب لها خافق طاف بغرابيله
صالح محمد محارب البشري - الرياض
يا ضايق الصدر وقتك واجد ازعاجه
والناس محد سليمٍ من غرابيله
وإن ضاق صدرك فصل لربك وناجه
إن كان وقت النهار وكان بالليله
وارفع يدينك وناجه كان لك حاجه
يكفيك ما تشتكي ويعدل الميله
عبدالله سعد المقاطي
الخير واجد له العربان محتاجه
الناس من حبها له دوم تاتي له
ذي فرصة ثم نشوف الكل في حاجه
عن المرابع وتبحث عن محاصيله
عن المدن كم تمنى اليوم مخراجه
عن كل موقع وتبحث عن تفاصيله
محمد بن عبدالعزيز الخنيفر - أشيقر
يروق بالي ليامن تاح لي حاجه
ابحث عن اللي أبيها مع تحاليله
اجلس مع اللي به الطيبات بهراجه
بجو يسرك وتحلى لك تعاليله
لامن هرج يسعدك في فلة حجاجه
هذا ومثيله نقول اليوم يا حليله
ريان بن محمد الخنيفر - أشيقر
مع أم سالم وهي بالروض دواجه
تسمع تعابيره ويطرِب مواويله
وتلقى الشواوي يزج الصوت لنعاجه
يارد غديره وماء الشِيب ما يجي له
عبدالكريم ابن خزيّم - البكيرية
بيت الاسبوع
كتبه للصفحة الشاعر حمد عبدالله الوايلي من حوطة سدير
وهو عن حث مواطني هذا البلد المعطاء على التقيد بالنظام.
ويقول:
النظام موضح في كل حاله
شارحينه زين في كل الوسايل
نستقبل صدى هذا البيت بثلاثة أبيات تدور حول هذا الموضوع، وخلال أربعة أيام من نشر البيت على الإيميل:
rb-khozama@alriyadh.com