كم واحد له غاية ماهرجها يكنها لو هو للادنين محتاج

بيت وصدى

كان بيت الاسبوع من اقتراح الاخ صالح المرشود للشاعر الامير محمد السديري رحمه الله والذي يقول:
كم واحد له غاية ماهرجها
يكنها لو هو للادنين محتاج
وكان صدى البيت من الشعراء:
لا مرته كلمه ردية سهجها
يبحث عن الطيب بسيره ومنهاج
يبعد عن الشوشه وكثرة لججها
وصفه كما قالوا مثل بير هداج
ويحرص على الفزعه ويرقى درجها
حافظ علي سره بقفل ومزلاج
ايضا دروب الشر ما قد ولجها
ومن المعزة يكسي الراس بالتاج
علي الرشيد - رياض الخبراء
بعض البشر يطلب من الله فرجها
للعون محتاج ولا حصل علاج
هو يكتم أسراره ولا هو درجها
ثم يطلب المولى يبحث عن افراج
من كثر فكره لقمته ما علجها
دايم من التفكير والعقل له ساج
الصدر ضايق وكلمته ما هرجها
لعل يلقى له طريق ومنهاج
محمد عبدالعزيز الخنيفر - أشيقر
يا لله ياللي كل كربه فرجها
عندك ولا غيرك من الخلق فراج
عدل او مورن كاثرات اعوجها
كم واحديمشي و ممشاه منعاج
يعلن هوا نفسه ويتبع نهجها
يبا التباهي في قناوات الابراج
بدر الحزيمي
حكمة بطل بالقاف قام ونسجها
تبقى لمن فكر مثل وصفة علاج
درر درر مثل الذهب في وهجها
أديب وشاعر وفارس مايحتاج
وكم طيب يسكت ونفسه سرجها
ويصبر ولو انه للاجواد محتاج
صالح البشري - الرياض
الله من نفس يكثر سهجها
ومن حاجته يلقى من الهم واحراج
لا من بغى حاجة واجه حرجها
الفكر ضايع ما لقى اليوم مخراج
كنه على نار يونس وهجها
لا هو لقى جابه ولا فيه منهاج
ريان محمد الخنيفر - اشيقر
في صدره مجود عليها درجها
قوس الحنايا دونها صار مزلاج
من خوف نمام ٍ علومه مرجها
راع النمايم للرداء دوم بواج
وألا عدو ٍ ما نحرج من حرجها
مكارم الاخلاق في كل منهاج
الله على الطيب يسهل فرجها
وألا على هذاك دنياه تنعاج
مشعل بن صنت العصيمي - الخرج
كم مرتن بعض الاوادم علجها
يخفي مرارتها ولا يبغا الاحراج
برجوى فرج ربه وربه فرجها
له مدتن ونوم بالطرف مالاج
ونفس زهجانه ويخفي زهجها
يروجبه هاجوس قلبه الى راج
دنياعلى الخلاق ربك فرجها
دنيا مثل روج البحر قلت لاراج
سعد صنهات السهلي - الدرعية
وكم واحدضايق يدورفرجها
الحظ عايق فيه ميلات منعاج
يقبل ويقفي يوم خيله سرجها
محتاج له عدت قرارات وعلاج
مبطي يعاني في حياته حرجها
مايرحمه وقته ولافيه منهاج
وعزي لمن حاله تبين عرجها
مشكاه للي طاعته نور وسراج
حمد عبدالله الوايلي - حوطة سدير
بيت الاسبوع
اقترحه للصفحة عبدالله بن زبن الاسلمي من حفر الباطن للشاعر خلف بن هذال العتيبي وبيته الذي يقول:
ياوطنا ياوطنا عمت عين الحسود
ماتهزك لا زوابع ولا غدر عملا
نستقبل صدى هذا البيت بأربعة أبيات حتى يوم الاربعاء القادم ويفضل الإرسال عبر الإيميل:
rb-khozama@alriyadh.com